Cigydd ifanc a’i fusnes cig ar y brig

Mae Tomos Hopkin, gŵr ifanc deunaw oed o Rhiwfawr ger Abertawe wedi ennill cystadleuaeth Cigydd Ifanc y Flwyddyn Cymru dair blynedd yn olynol, yn ogystal ag ennill gwobr Grand Slam Cigydd Ifanc y Flwyddyn Prydain, ac yn ddiweddar cafodd ei enwi’n Brentis Ifanc y Flwyddyn yng Ngwobrau Prentisiaethau Cymru.

Dywedodd Tomos:

“Heb brentisiaeth fydden i heb gael y cymwysterau a’r sgiliau i redeg fy musnes fy hun.  Rwy’n bendant yn argymell prentisiaeth i unrhyw un oherwydd mae’n ffordd o ennill cyflog a dysgu ar yr un pryd, a chael crefft yn y pen draw.”

Wedi cwblhau Prentisiaeth Sylfaen mewn Cynhyrchu Bwyd, Trin Cig a Dofednod a Sgiliau Manwerthu, lansiodd Tomos gwmni Gwyrhyd Mountain Meat.  Mae’r mentrwr ifanc yn mynd o ddrws i ddrws i werthu cig oen Cymreig, cig eidion, porc, cyw iâr a thwrci o fferm y teulu, Crachllwyn ger Abertawe.

“Drwy lansio’r busnes a gwneud y rownd gig mae’r fferm wedi dod yn fwy proffidiol, ac mae’r adborth da gan gwsmeriaid wedi bod yn werthfawr iawn.

“Dechreuais drwy ddosbarthu i gartrefi yn yr ardal, ond nawr rydw i wedi symud ymlaen at y busnesau a’r gwestai lleol. Mae gen i lawer o gynlluniau ar gyfer y dyfodol ac rwy’n bwriadu parhau i ehangu’r busnes ac adeiladu ar fy llwyddiant hyd yn hyn.”

Yn ein Rhaglen Lywodraethu, ymrwymodd Llywodraeth Cymru i gynyddu cyfleoedd prentisiaeth ar gyfer pobl ifanc a pharhau i gefnogi cyflogwyr sy’n cynnig prentisiaethau o safon uchel.

Bellach mae dros 40,000 o brentisiaethau yng Nghymru mewn amrywiol sectorau gan gynnwys iechyd a gwasanaethau cyhoeddus, gweinyddiaeth busnes, adeiladu, peirianneg, manwerthu a gwasanaeth cwsmeriaid.