Colli Swyddi yn SONY

Mae’n flin iawn gennyf glywed bod cwmni Sony ar fin cyhoeddi eu bod yn ailstrwythuro’u cyfleusterau gweithgynhyrchu yng Nghymru. Bydd hyn yn golygu colli 84 swydd ym Mhen-y-bont ar Ogwr a 210 swydd ym Mhencoed. Bwriedir cyflawni hyn drwy gynnig diswyddiadau gwirfoddol a phecynnau mwy manteisiol.

Mae Awdurdod Datblygu Cymru a Llywodraeth y Cynulliad yn gweithio gyda’r cwmni a byddant yn cysylltu â’r Ganolfan Byd Gwaith, Gyrfa Cymru ac Asiantaethau eraill er mwyn helpu’r rhai a gafodd eu diswyddo.

Mae Llywodraeth Cynulliad Cymru wedi ymrwymo i weithio gyda’r cwmni ar strategaeth er mwyn eu helpu i arallgyfeirio’u gwaith yng Nghymru. Yr wyf wedi sefydlu tîm prosiect i helpu’r cwmni ac maent eisoes wedi cyfarfod.

Er bod y cyhoeddiad yn newyddion drwg i’r cwmni, bydd Sony yn parhau i fod yn un o brif gyflogwyr ardal Pen-y-bont, gyda thros 1500 o staff. Penderfyniad masnachol ydyw ac yn sicr nid oedd yn un a wnaed ar chwarae bach. Yn bersonol yr wyf wedi ymrwymo i wneud pob dim o fewn fy ngallu i helpu’r cwmni, er mwyn iddynt barhau yn un o brif gyflogwyr Cymru.