Ysgrifenedig - Cyngor Sir Ynys Môn

Heddiw rwyf wedi cwrdd ag Arweinydd, Dirprwy Arweinydd a Phrif Weithredwr Cyngor Sir Ynys Môn i drafod y camau nesaf ar ôl yr archwiliad llywodraethu corfforaethol a gynhaliwyd gan Swyddfa Archwilio Cymru.

Ddoe cyhoeddais Gyfarwyddyd o dan Adran 15 o Ddeddf Llywodraeth Leol 1999 a fydd yn ei gwneud yn ofynnol i’r Cyngor gydweithredu â Bwrdd Adfer a fydd yn goruchwylio’r gwaith o weithredu argymhellion Swyddfa Archwilio Cymru. 

Mae’r Cyfarwyddyd hefyd yn caniatáu imi benodi Rheolwr Gyfarwyddwr dros dro i gymryd cyfrifoldeb am y Cyngor a chynnal y broses adfer. Bydd y Bwrdd Adfer yn ei gwneud yn ofynnol i’r Cyngor lunio Cynllun Adfer a fydd yn nodi sut y mae’n bwriadu ymateb i argymhellion yr Archwilydd Cyffredinol.
 
Yn y cyfarfod heddiw, amlinellais y prif feysydd o bryder yr wyf yn disgwyl i’r Bwrdd ganolbwyntio arnynt. Ymysg y rhain y mae:

• datblygu gweledigaeth glir ar gyfer Ynys Môn, ynghyd â blaenoriaethau corfforaethol ar gyfer y Cyngor, a chyfleu’r rhain yn effeithiol i staff y Cyngor a dinasyddion Ynys Môn;
• atgyfnerthu’r canol corfforaethol fel bod mwy o allu gan y Cyngor i ymateb i’r her o fwrw ati â gwelliannau a darparu gwasanaethau cyhoeddus sy’n diwallu anghenion dinasyddion Ynys Môn;
• ad-drefnu’r Pwyllgor Safonau fel bod ganddo rôl fwy rhagweithiol yn gosod safonau a rheoli ymddygiad yr Aelodau;
• cefnogi’r Aelodau i gael gwell dealltwriaeth o’u swyddogaeth graffu, a datblygu’r swyddogaeth honno.

Bydd y Bwrdd Adfer yn goruchwylio hynt y gwaith o gyflawni’r blaenoriaethau a bydd yn fy nghynghori a oes angen addasu rhagor ar y Cynllun Adfer. Wrth wneud hynny, bydd y Bwrdd yn derbyn tystiolaeth gan yr Aelodau, swyddogion ac eraill i brofi’r cynnydd hwn. Un o swyddogaethau allweddol y Bwrdd fydd asesu cynaliadwyedd unrhyw newidiadau a’r rhagolygon ar gyfer adferiad yn y tymor hir.