Ysgrifenedig - Y Mesur arfaethedig ynghylch Diogelwch ar Gludiant i Ddysgwyr (Cymru)

Mae’r Mesur arfaethedig ynghylch Diogelwch ar Gludiant i Ddysgwyr (Cymru) wedi’i osod heddiw.

Bydd y Mesur arfaethedig yn gwneud newidiadau y bwriedir iddynt wella safonau diogelwch cerbydau modur i’w defnyddio i ddarparu cludiant dan gontract i ddysgwyr. Bydd y pwerau fframwaith yn y Mesur yn ein galluogi ni, drwy’r Rheoliadau, i osod ystod eang o ddyletswyddau ar awdurdodau lleol o ran safonau diogelwch ar fysiau ysgol sydd ganddynt o dan gontract.

Mae’r Mesur arfaethedig yn gwneud darpariaeth i Reoliadau gael eu gwneud mewn perthynas â’r canlynol:

• disgrifiadau o gerbydau y caniateir eu defnyddio yn gludiant i ddysgwyr (Adran 1 o’r Mesur arfaethedig)
• recordio delweddau gweledol neu sain ar gludiant i ddysgwyr (Adran 2)
• asesiadau risg diogelwch o gludiant i ddysgwyr a ddarperir neu fel arall a sicrheir gan awdurdod lleol neu gorff llywodraethu ysgol a gynhelir (Adran 3)
• camau i’w cymryd gan awdurdodau lleol ac ysgolion i sicrhau bod gyrwyr cerbydau a ddefnyddir i ddarparu cludiant i ddysgwyr yn cael hyfforddiant priodol (Adran 4)
• darparu goruchwylwyr ar gludiant i ddysgwyr (Adran 5)
• cosbi a gorfodi (Adrannau  6-11 ac Atodlen A1)

Byddaf yn gwneud datganiad deddfwriaethol yn y Cyfarfod Llawn yfory er mwyn cyflwyno’r Mesur arfaethedig.