Cyfieithu deddfwriaethol

Diben y gwasanaethau hyn yw cynorthwyo Llywodraeth Cynulliad Cymru i lunio drafftiau dwyieithog o Offerynnau Statudol a Mesurau’r Cynulliad a noddir gan Weinidogion Cymru yn unol â Chynllun Iaith Gymraeg Llywodraeth y Cynulliad a Deddf Llywodraeth Cymru 2006.

Dim ond dau sefydliad yn y Deyrnas Unedig sy'n llunio mwy o Offerynnau Statudol na Llywodraeth y Cynulliad, a chaiff y mwyafrif helaeth ohonynt eu gwneud yn ddwyieithog gyda chymorth y cyfieithwyr deddfwriaethol. Ers i Ddeddf Llywodraeth Cymru 2006 ddod i rym, mae’r cyfieithwyr deddfwriaethol hefyd yn helpu i baratoi testun Cymraeg Mesurau’r Cynulliad a noddir gan Weinidogion Cymru.

Mae’r Gwasanaeth Cyfieithu wedi cyhoeddi geirfa a chanllawiau arddull ar gyfer cyfieithu a drafftio deddfwriaeth yn Gymraeg. Cawsant eu paratoi’n wreiddiol er mwyn helpu’r cyfieithwyr deddfwriaethol yn eu gwaith ac er mwyn sicrhau cysondeb ar draws holl ddeddfwriaeth y Cynulliad. Maent wedi’u cyhoeddi ar y we yn y gobaith y byddant yn ddefnyddiol i eraill sy’n cyfieithu deddfwriaeth ac i unrhyw un sy’n drafftio deddfwriaeth yn Gymraeg.