Cwrdd â’r Her Tai: Creu consensws ar gyfer gweithredu

Gall tai ddylanwadu’n fawr ar les pobl, yn gymdeithasol ac yn economaidd. Mae’n faes, felly, sy’n chwarae rhan allweddol yn y gwaith yr ydym yn ei wneud i fynd i’r afael â thlodi ac anghydraddoldeb.

Rydym yn ymrwymedig i sicrhau bod cartref boddhaol ar gael i bawb. Ond mae heriau mawr yn ein hwynebu ac nid ydynt yn rhai hawdd i’w datrys:

• Nid oes digon o gartrefi ar gael i bawb am fod y boblogaeth yn cynyddu, am fod pobl yn byw yn hirach, ac am fod mwy o bobl yn dewis byw ar eu pen eu hunain;
• Mae angen gwella llawer o dai, yn enwedig y rheini sy’n cael eu rhentu oddi wrth landlordiaid preifat a rhai o’r tai hŷn y mae pobl yn berchen arnynt;
• Sicrhau bod pobl yn cael y gwasanaethau y mae eu hangen arnynt er mwyn dod o hyd i gartref, a’i gadw, yn enwedig y bobl hynny sydd mewn amgylchiadau personol anodd iawn neu sy’n wynebu sefyllfaoedd argyfyngus yn eu cartrefi;
• Mae’r cynnydd yng nghostau byw a’r newidiadau i fudd-daliadau yn effeithio ar bobl, ac mae’r effaith honno’n destun pryder.

Mae arian cyhoeddus yn brin, ac mae hynny’n golygu bod yn rhaid i ni wneud penderfyniadau anodd ynghylch sut i’w wario.

Byddem yn falch iawn o gael clywed eich barn am y materion a wyntyllir yn y ddogfen hon ac am unrhyw faterion eraill sy’n berthnasol i ddiwallu anghenion pobl o ran tai.

Mae’r ddogfen yn nodi’r heriau sy’n ein hwynebu. Mae’n ymdrin â’r materion a ganlyn:

• Fforddiadwyedd;
• Stiwardio’r system – rôl Llywodraeth Cymru;
• Y cyflenwad o dai;
• Ansawdd;
• Atal digartrefedd a helpu pobl agored i niwed;
• Gwella gwasanaethau cyhoeddus a gwella safonau; 
• Gwireddu manteision buddsoddi mewn tai.

Bydd y sylwadau a ddaw i law yn ein helpu gyda’r gwaith cychwynnol ar y Bil Tai.