Adolygiad o gyfarwyddiadau sy’n ei gwneud hi’n ofynnol atgyfeirio ceisiadau cynllunio at Weinidogion Cymru

Rydym am wneud nifer o newidiadau i’r mathau o geisiadau cynllunio y mae’n ofynnol eu hatgyfeirio at Weinidogion Cymru.

Mae’r ymgynghoriad hwn yn amlinellu ein hadolygiad o’r data a’r cyfarwyddiadau cyfredol sy’n ymwneud â cheisiadau sy’n cael eu hatgyfeirio at Weinidogion Cymru a’u galw i mewn ganddynt ar hyn o bryd. Mae’r ymgynghoriad yn esbonio ein newidiadau arfaethedig i’r system bresennol.

Beth yw’r prif faterion?

Mae’r ymgynghoriad wedi’i rannu’n dair adran. Mae’r adrannau hyn yn rhoi sylw i:

• gyfarwyddiadau yr ydym am iddynt aros yr un fath;
• cyfarwyddiadau yr ydym yn cynnig eu diddymu; a
• chyfarwyddyd newydd arfaethedig sydd wedi’i gydgrynhoi sy’n amlinellu’r mathau o ddatblygiad y mae’n ofynnol eu hatgyfeirio at Weinidogion Cymru.

Nid ydym yn cynnig newid ein polisi cyfredol ar gyfer penderfynu a ddylid galw ceisiadau cynllunio i mewn ai peidio. Amlinellir y meini prawf ar gyfer galw cais i mewn ym ‘Mholisi Cynllunio Cymru: Rhifyn 4’ paragraff 3.12.1.

Pe bai’r cynigion hyn yn cael eu mabwysiadu, ni fyddai’n atal Gweinidogion Cymru rhag gallu galw unrhyw gais cynllunio penodol i mewn.