Llywodraeth Cymru | Mae gwaith un o gwmnïau Cymreig mwyaf blaengar y byd yn ehangu diolch i allforion

Hafan > Newyddion > Busnes a'r economi > 2008 > Mae gwaith un o gwmnïau Cymreig mwyaf blaengar y byd yn ehangu diolch i allforion

Newyddion

Cofrestrwch ar gyfer y canlynol: Cylchlythyr | Newyddion

Mae gwaith un o gwmnïau Cymreig mwyaf blaengar y byd yn ehangu diolch i allforion

Gan fod allforion byd-eang wedi tyfu’n gryf mae cwmni Carpenter and Paterson sy’n gweithredu o’r Trallwng, sef un o ddylunwyr a chynhyrchwyr mwyaf blaenllaw'r byd ym maes offer cynnal pibellau, yn agor cangen newydd yn Singapore, De-ddwyrain Asia.

Dydd Llun 29 Rhagfyr 2008

Trwy wrthwynebu’r dirywiad yn yr economi, mae Carpenter and Patterson, sef cwmni teuluol sydd wedi gweithredu o’r Canolbarth ers mwy na 50 blynedd, wedi allforio dwywaith yn fwy dros y 12 mis diwethaf i gwsmeriaid rhyngwladol yn y diwydiannau olew, nwy, petrocemegol a chynhyrchu pŵer.

Ymhlith y prif gontractau roedd rhai i gyflenwi offer i’r ddwy burfa betrocemegol fwyaf yn y byd - sy’n cael eu hadeiladu ar hyn o bryd yn Saudi Arabia ac yn yr India. Mae’r cwmni yn anfon ei beirianwyr i’r India i oruchwylio’r gwaith o osod ei gynhyrchion yn y burfa newydd yn Jamnanar.

Bellach, bydd cangen newydd Carpenter and Paterson yn Asia yn darparu gwasanaeth lleol pwrpasol ar gyfer cwsmeriaid yn y rhanbarth.

Meddai Ieuan Wyn Jones y Dirprwy Prif Weinidog:

Mae llwyddiant Carpenter and Paterson yn dangos sut y mae rhagoriaeth o ran ansawdd cynnyrch a gwasanaeth i gwsmeriaid yn gallu arwain at lwyddiant, hyd yn oed yn y meysydd mwyaf heriol. Mae cyflenwi cynhyrchion allweddol ar gyfer prosiectau mawr ledled y byd yn gyrhaeddiad arbennig - ac rwy’n llongyfarch y cwmni ar agor ei swyddfa newydd yn Singapore.

Meddai Richard Macdonald, cyfarwyddwr gwerthu:

Nawr yw’r amser iawn i fuddsoddi yn y rhan gyffrous hon o’r byd. Byddwn bellach yn gallu cynnal gwasanaeth cymorth technegol a gwerthu cynhwysfawr yn lleol i’n rhestr o gwsmeriaid yn Ne-ddwyrain Asia. Mae’r rhestr hon yn tyfu’n barhaus.

Ers i’r cwmni gael ei sefydlu ym 1956, mae wedi dod yn un o gynhyrchwyr systemau cynnal pibellau mwyaf y byd. Mae wedi ennill clod ar draws y byd am ei ddibynadwyedd a’i arbenigedd technegol. Mae cwmni hefyd yn brofiadol iawn o ran cyflenwi cydrannau i weithfeydd sy’n wynebu amodau amgylcheddol caled yn Ne-ddwyrain Asia ac yn rhanbarthau'r Dwyrain Canol er enghraifft ac i rai eraill sy’n wynebu amodau arbennig o oer mewn rhannau o Rwsia a’r Gwladwriaethau Baltig.

Mae gan y cwmni fwy na 5,000 o gwsmeriaid erbyn hyn ac mae’i gynhyrchion, sy’n cael eu gwneud yn y Trallwng, wedi cyrraedd y mwyafrif o wledydd.

29 Rhagfyr 2008