Y Gweinidog yn cyhoeddi bod arian yn cael ei ddarparu er mwyn sicrhau nad yw’r Holocost yn mynd yn angof

Mae’r prosiect Gwersi o Auschwitz yn cael ei ariannu drwy Raglen Addysg Ryngwladol Llywodraeth Cymru, ac yn cael ei reoli gan Ymddiriedolaeth Addysgol yr Holocost (HET). Mae’n rhoi cyfle i ddysgwyr feithrin a dyfnhau eu dealltwriaeth o’r Holocost drwy raglen strwythuredig ac iddi bedwar cam.  

Mae’r prosiect yn cael ei dargedu at bobl ifanc rhwng 16 a 18 oed, ac mae ymweliad ag Auschwitz-Birkenau yng Ngwlad Pwyl yn rhan ganolog ohono, er mwyn i’r bobl ifanc gael mynd i lygad y ffynnon i ddysgu am yr Holocost a sut mae’n berthnasol i ni heddiw.

Wrth gyhoeddi’i benderfyniad, dywedodd y Gweinidog:

“Mewn cymdeithas fyd-eang, mae’n hanfodol bod pobl ifanc yng Nghymru yn deall yn union beth ddigwyddodd yn Auschwitz, ac yn dysgu o wersi’r gorffennol.

“Heddiw, mae goddefgarwch a chynhwysiant mor bwysig ag erioed, felly mae’n bwysig bod myfyrwyr yn ystyried hefyd sut mae gwersi Auschwitz yn berthnasol i’n cymdeithas ni yn y byd modern sydd ohoni.

“Mae’r gwaith y mae’r Ymddiriedolaeth wedi’i wneud yng Nghymru yn ystod y tair blynedd diwethaf wedi creu cryn argraff arna i, a dw i’n falch o fedru cyhoeddi y bydd cynnydd yn y cymorth y bydd Llywodraeth Cymru yn ei roi i’r prosiect Gwersi o Auschwitz yn ystod y tair blynedd nesaf.”

Dywedodd Karen Pollock MBE, Prif Weithredwr Ymddiriedolaeth Addysgol yr Holocost:  

“Rydyn ni’n hynod falch bod Llywodraeth Cymru yn cydnabod gwerth ein prosiect Gwersi o Auschwitz. Wrth i’r blynyddoedd fynd heibio, mae’n bwysicach nag erioed bod pobl ifanc yn dysgu am yr Holocost ac yn deall beth ddigwyddodd.”

Rhannu

Delicious

Digg

reddit

Facebook

Gwefannau

Tagiau

Newyddion yn ôl chwiliad

Newyddion yn ôl pwnc

• Y Gogledd
• Y Canolbarth
• Y De-orllewin
• Y De-ddwyrain
• Cymru Gyfan