Llywodraeth Cymru | £770,000 ar gyfer parhau â’r cynllun grantiau gwisg ysgol

Hafan > Newyddion > Addysg a sgiliau > 2012 > £770,000 ar gyfer parhau â’r cynllun grantiau gwisg ysgol

Cofrestrwch ar gyfer y canlynol: Cylchlythyr | Newyddion

£770,000 ar gyfer parhau â’r cynllun grantiau gwisg ysgol

Mae’r Gweinidog Addysg, Leighton Andrews, am neilltuo £770,000 yn 2012/13 i helpu teuluoedd sydd ar incwm isel i brynu gwisg ysgol i’w plant.

Dydd Llun 26 Mawrth 2012

Mae’r cynllun hwn yn benodol ar gyfer disgyblion sy’n dechrau mewn ysgol uwchradd ac sy’n gymwys i gael cinio am ddim. Mae hefyd ar gyfer disgyblion 11 oed, ar ddechrau’r flwyddyn ysgol, sy’n mynd i ysgol arbennig, lleoliad adnoddau anghenion arbennig neu uned cyfeirio disgyblion ac sy’n gymwys i gael cinio am ddim.

Dyma’r adeg pan fydd rhieni’n wynebu’r gost fwyaf o ran prynu gwisg ysgol.

Dywedodd Leighton Andrews:

“Rydyn ni’n gwybod bod prynu gwisg ysgol newydd i blentyn sy’n dechrau yn yr ysgol uwchradd yn gallu bod yn ddrud. Heddiw dw i wedi cyhoeddi y bydd £105 ar gael i bob plentyn cymwys i helpu gyda’r costau hyn ar gyfer y flwyddyn ysgol 2012/2013.

“Mae ein cynllun wedi bod yn llwyddiant mawr yn y modd mae wedi helpu teuluoedd incwm isel i brynu gwisg ysgol i’w plant. Hoffwn annog teuluoedd sy’n gymwys i ymgeisio am grant o dan y cynllun trwy gysylltu â’u hawdurdod lleol cyn gynted â phosibl.”