Dirprwy Weinidog i gyfarfod â phobl ifanc a chyflogwyr yn y Gogledd i drafod sgiliau a swyddi

Byddan nhw’n cymryd rhan yn y Sgwrs Go Iawn a fydd yn cael ei chynnal heno yng Nghae Rasio Bangor Is-coed ger Wrecsam.

Bydd tua 55 o bobl ifanc o’r ysgolion isod yn cymryd rhan yn y drafodaeth:

• Ysgol Uwchradd Gatholig ac Anglicanaidd Sant Joseff
• Coleg Powys, y Drenewydd
• Ysgol Uwchradd y Fflint
• Ysgol Uwchradd Rhosnesni
• Ysgol Uwchradd John Summers
• Ysgol Uwchradd Darland

Byddan nhw’n ymuno â chyflogwyr a phobl broffesiynol sy’n gweithio ym maes addysg yn yr ardal i drafod sgiliau, cymwysterau a’r farchnad swyddi.

“Mae’r Sgwrs Go iawn yn gyfle gwych i ddod â phobl ifanc a busnesau at ei gilydd i drafod sgiliau a chymwysterau. Mae angen yr asedau pwysig hyn ar bobl ifanc er mwyn iddyn nhw fedru cystadlu yn y farchnad swyddi,” meddai’r Dirprwy Weinidog.  

“Mae mynd i’r afael â diweithdra ymhlith pobl ifanc yn parhau i fod yn un o’n prif flaenoriaethau. Fel Llywodraeth, mae’n rhaid i ni wneud popeth o fewn ein gallu i helpu’n pobl ifanc i gael swyddi.

“Yn ôl ym mis Medi, lansiais i Adolygiad o Gymwysterau ar gyfer pobl ifanc rhwng 14 a 19 oed yng Nghymru,  er mwyn gweld a oes modd i ni symleiddio’r system. Ein gweledigaeth yw sicrhau bod gennym gymwysterau gwerthfawr a dealladwy sy’n diwallu anghenion Cymru.

“Mae’r cyfarfod yma heddiw yn gyfle i’r bobl y bydd yr adolygiad yn effeithio arnyn nhw gael dweud eu dweud.”

Nod yr Adolygiad yw nodi pa gymwysterau sydd fwyaf perthnasol a sicrhau bod y cymwysterau hynny:

• ar gael i ddysgwyr;
• yn rhai y mae pobl yn ymddiried ynddynt ac yn eu deall;
• yn rhai ac iddynt werth gwirioneddol;
• yn cynorthwyo pobl i wneud cynnydd yn eu dysgu ac i symud ymlaen i fyd cyflogaeth;
• yn parhau i ateb y gofyn.

Bydd y Dirprwy Weinidog hefyd yn trafod gwaith yr Uned a sefydlwyd gan Lywodraeth Cymru i ymdrin â Gwybodaeth am y Farchnad Lafur.  

Ychwanegodd:

“Rydyn ni’n gweithio i sicrhau bod gan bobl ifanc yr wybodaeth sydd ei hangen arnyn nhw i wneud penderfyniadau doeth, bod gan ddarparwyr yr wybodaeth angenrheidiol er mwyn cynllunio cyrsiau sy’n diwallu anghenion cyflogwyr ac unigolion, a bod yr wybodaeth y mae cyflogwyr yn ei rhoi i ni yn cael effaith wirioneddol.  

“Bellach, am y tro cyntaf, drwy ‘beta’, gwefan newydd Gyrfa Cymru, gall pobl ifanc gael gafael ar daflenni ffeithiau sy’n rhoi gwybodaeth lawn am yrfaoedd, gan gynnwys llwybrau gyrfa, swyddi gwag, gwybodaeth am y cyrsiau sydd ar gael, a thueddiadau yn y gorffennol o ran cyflogau a’r swyddi a oedd ar gael.”

Rhannu

Delicious

Digg

reddit

Facebook

Tagiau

Newyddion yn ôl chwiliad

Newyddion yn ôl pwnc

• Y Gogledd
• Y Canolbarth
• Y De-orllewin
• Y De-ddwyrain
• Cymru Gyfan