Llywodraeth Cymru | Rho amser i ddarllen…mae deng munud y dydd yn ddigon

Hafan > Newyddion > Addysg a sgiliau > 2012 > Rho amser i ddarllen…mae deng munud y dydd yn ddigon

Cofrestrwch ar gyfer y canlynol: Cylchlythyr | Newyddion

Rho amser i ddarllen…mae deng munud y dydd yn ddigon

Mae Llywodraeth Cymru wedi lansio ymgyrch sy’n annog plant i ddarllen.

Dydd Llun 02 Ebrill 2012

Enw’r ymgyrch yw ‘Rho amser i ddarllen’, a’i bwriad yw codi ymwybyddiaeth o werth darllen. Mae’n annog rhieni, gofalwyr a theidiau a neiniau i ddarllen mwy gyda’u plant – gan bwysleisio y gall darllen gyda’ch plentyn am ddeng munud bob diwrnod wneud gwahaniaeth mawr.

Mae’r ymgyrch yn pwysleisio pwysigrwydd darllen amrediad eang o ddeunyddiau gwahanol sy’n amrywio o lyfrau, llyfrau comics a gwefannau i’r rhestr siopa wythnosol, a bydd yr hysbyseb i’w chlywed ar y radio a’i gweld mewn sinemâu.

Bydd ymgyrch ar-lein i gyd-fynd â’r hysbysebion. Bydd y wefan www.betterreading.co.uk ar ei newydd wedd a cheir cynghorion a deunyddiau defnyddiol ar gyfer athrawon a disgyblion fel ei gilydd. Bydd yr ymgyrch hefyd yn cael ei hysbysebu ar Facebook, bydd e-grawn ar gyfer rhieni a bydd hysbyseb yn ymddangos ar bedair gwefan ddigidol arall gan gynnwys CITV Player a S4C Clic.

Bydd yr ymgyrch hon yn cael ei chyflwyno wrth i’r byd ddathlu Diwrnod Rhyngwladol Llyfrau Plant ar 2 Ebrill neu o gwmpas y dyddiad hwnnw – sef diwrnod pen-blwydd Hans Christian Andersen.

Wrth groesawu’r ymgyrch, dywedodd Leighton Andrews, y Gweinidog Addysg a Sgiliau:

“Nid oes dim byd yn fwy pwysig na sicrhau bod ein pobl ifanc i gyd yn cyrraedd y lefel darllen sy’n briodol ar gyfer eu hoed ac fel Gweinidog rwyf yn benderfynol o sicrhau y byddwn yn codi safonau llythrennedd.

“Os ydym eisiau annog arferion darllen da, yna mae’n holl bwysig bod pob math o ddeunydd darllen ar gael i bob plentyn boed hynny’n llyfrau, gwefannau, llyfrau comics neu’n gylchgronau.

“Mae gan rieni, gofalwyr a theidiau a neiniau rôl bwysig i’w chwarae. Gall darllen gyda phlentyn am ddeng munud y dydd wneud gwahaniaeth mawr i’w allu a’i hyder yn gyffredinol.

“Nod yr ymgyrch hon yw dangos y gall darllen agor drysau a hoffwn annog ein pobl ifanc, eu rhieni a’u gofalwyr i wrando ar neges yr ymgyrch a gwneud amser i ddarllen.”