Llywodraeth Cymru | Cynllun £75 miliwn i greu 12,000 o swyddi yng Nghymru

Hafan > Newyddion > Addysg a sgiliau > 2012 > Cynllun £75 miliwn i greu 12,000 o swyddi yng Nghymru

Cofrestrwch ar gyfer y canlynol: Cylchlythyr | Newyddion

Cynllun £75 miliwn i greu 12,000 o swyddi yng Nghymru

Heddiw lansiodd Carwyn Jones, Prif Weinidog Cymru, gynllun newydd gwerth £75m a fydd yn creu 12,000 o gyfleoedd gwaith newydd dros y tair blynedd nesaf.

Dydd Mawrth 03 Ebrill 2012

Bydd Twf Swyddi Cymru yn creu cyfleoedd gwaith newydd

Bydd Twf Swyddi Cymru yn creu cyfleoedd gwaith newydd i bobl ifanc ddi-waith, 16-24 oed, am gyfnod o 6 mis ac yn rhoi’r cyfle i fusnesau ehangu a gwneud y swyddi hynny’n rhai parhaol.

Yn ystod ymweliad â Scarlet Communications yng Nghaerfyrddin, un o’r cwmnïau sy’n cymryd rhan yng nghynlluniau peilot y rhaglen, dywedodd Carwyn Jones:

“Mae Twf Swyddi Cymru yn gweithredu un o’r prif bolisïau i hyrwyddo twf economaidd a swyddi yng Nghymru.

“Nid yn unig bydd y cynllun hwn yn creu cyfleoedd i bobl ifanc ddi-waith, sydd wedi dioddef yn fwy na’r cyffredin yn y dirwasgiad, ond bydd y swyddi hyn hefyd yn swyddi ewydd, gan helpu busnesau Cymru i ehangu.”

Caiff y bobl ifanc eu talu ar sail yr Isafswm Cyflog Cenedlaethol neu’n uwch am o leiaf 25 awr yr wythnos. Rhaglen yw hon ar gyfer y rheini sy’n barod am waith ond heb allu dod o hyd i swydd.

Dywedodd Jeff Cuthbert, y Dirprwy Weinidog Sgiliau:

“Yn sgil y problemau ariannol diweddar, rydyn ni wedi gweld nifer cynyddol o bobl ifanc 16-24 oed yn methu â chael gwaith neu heb fod yn dilyn cwrs addysg,” esboniodd.

“Bydd Twf Swyddi Cymru yn ei gwneud yn bosibl i unigolion allu ennill profiad gwaith o ansawdd er mwyn cael gwaith parhaol neu brentisiaeth lle bo hynny’n briodol. Caiff y mwyafrif o swyddi eu creu o fewn y sector preifat, er bydd rhai ar gael yn y sector gwirfoddol hefyd.

“Bydd angen i fusnesau sy’n cymryd rhan yn y cynllun ddangos bod y swyddi rydyn ni’n eu cefnogi yn rhai newydd. Byddwn ni’n gweithio gyda phob cyflogwr a pherson ifanc i wneud ein gorau i sicrhau bod rhwbeth i bawb anelu ato, boed yn waith amser llawn gyda’r cyflogwr presennol, yn brentisiaeth neu’n waith amser llawn gyda chyflogwr arall.”

Dywedodd Jason Rosser, Rheolwr Gyfarwyddwr Scarlet Communications:

“Roedden ni wrth ein bodd yn cael cymryd rhan yn y cynllun arloesol hwn. Nid yn unig rydyn ni wedi gallu cynnig profiad gwerthfawr i bobl ifanc frwdfrydig a thalentog, ond mae hefyd wedi rhoi cyfle inni ehangu ein busnes i feysydd newydd. Yn sgil y rhaglen, rydyn ni’n gobeithio gallu creu swyddi parhaol newydd a chynnig gwaith amser llawn i bawb yn y cynllun.”

Yn dilyn peilot llwyddiannus, dywedodd Mr Cuthbert fod gan gwmnïau bach a mawr o’r sector preifat o bob rhan o Gymru ddiddordeb mewn ymuno â’r rhaglen, gan gynnig cyfleoedd i bobl ifanc.

Dyma rai enghreifftiau o’r cwmnïau hynny:

Target Group. Meddalwedd a gwasanaethau TG
Cwmni yswiriant Admiral
TB Davies ym Mhen-y-bont ar Ogwr. Un o brif gyflenwyr sgaffaldau’r DU i ddiwydiant.
Meritor Cwmbran. Peirianneg, Gweithgynhyrchwyr Brêcs Cerbydau Trwm.
Pennaf Cyf. Gwasanaethau tai yn y Canolbarth a’r Gogledd.
Emrys Art Supplies, â siopau yng Nghaerfyrddin a Hwlffordd.
Cerrig Granite & Slate. Pwllheli. Un o brif arbenigwyr gwaith cerrig y DU.

Esboniodd Mr Cuthbert y bydd y rhaglen hefyd yn rhoi cyfle i fynd i’r afael â rhai materion penodol o fewn economi Cymru. Bydd tair ffrwd benodol yn targedu graddedigion, micro-fusnes a swyddi gwyrdd.

Gall pobl ifanc wneud cais drwy wefan Twf Swyddi Cymru, yn www.gyrfacymru.com