Newyddion trwy RSS
Derbyniwch ein cylchlythyr
Busnes a'r economi
Plant a phobl ifanc
Diwylliant a chwaraeon
Addysg a sgiliau
Yr amgylchedd a chefn gwlad
Cydraddoldeb ac amrywiaeth
Iechyd a gofal cymdeithasol
Tai a chymunedau
Gwella gwasanaethau cyhoeddus
Rhyngwladol
Llywodraeth leol
Pobl hŷn
Cynllunio
Cyfiawnder cymdeithasol
Ystadegau
Datblygu cynaliadwy
Twristiaeth
Trafnidiaeth
Y Gymraeg
Yn dod i ben yn fuan (2)
Ychwanegwyd yn ddiweddar (10)
Ceir yn y Rhaglen Llythrennedd Genedlaethol a gaiff ei lansio’n ffurfiol gan y Gweinidog yn Ysgol Cwm Garw ym Mhen-y-bont ar Ogwr y camau y bydd angen i Lywodraeth Cymru a’i phartneriaid eu cymryd er mwyn gweld safonau llythrennedd yn codi’n sylweddol dros y pum mlynedd nesaf.
Mae’r Rhaglen yn dwyn ynghyd nifer o fentrau allweddol i godi safonau a hefyd yn amlinellu’r hyn sydd angen ei wneud i gynorthwyo athrawon i roi hyn oll ar waith. Bydd y camau gweithredu’n canolbwyntio ar y pedair thema ganlynol:
- Pennu disgwyliadau a safonau cenedlaethol
- Mwy o gymorth a datblygiad
- Ymyriadau mwy trylwyr wedi’u targedu’n benodol
- Mwy o atebolrwydd a her.
Ymhlith y prif fentrau yn y Rhaglen y mae cymorth wedi’i dargedu i ddisgyblion, cymorth tuag at ddatblygiad proffesiynol athrawon; rhannu arferion da a’u defnyddio mewn modd sy’n gyson; fframwaith Llythrennedd a Rhifedd Cenedlaethol statudol; a datblygu profion darllen cenedlaethol.
Un o amcanion pwysicaf y Rhaglen Llythrennedd Genedlaethol yw cefnogi athrawon ym mhob pwnc ar draws pob cyfnod addysg i fod yn athrawon llythrennedd.
Yn rhan o’r rhaglen bydd gan athrawon y cyfle i wneud gwaith astudio ychwanegol wrth addysgu llythrennedd, gan gynnwys modiwl llythrennedd penodol ar gyfer y cymhwyster Gradd Meistr mewn Ymarfer Addysgol; dysgu oddi wrth athrawon sydd wedi rhagori ym maes llythrennedd ac a fydd y rhannu eu harbenigedd; a chymryd rhan yng ngweithgareddau Cymunedau Dysgu Proffesiynol.
Ceir yn y Fframwaith Llythrennedd a Rhifedd Cenedlaethol a gyhoeddir at ddibenion ymgynghori ym mis Mehefin, ganllaw hanfodol ar gyfer cynllunio’r cwricwlwm ar gyfer athrawon. Bydd hefyd yn amlinellu’r disgwyliadau blynyddol clir ar gyfer llythrennedd a rhifedd ar gyfer pob dysgwr rhwng 5 a 14 oed.
Bydd ysgolion cynradd ac uwchradd yn defnyddio’r Rhaglen Llythrennedd Genedlaethol i sicrhau bod y gwaith o addysgu sgiliau llythrennedd a rhifedd yn cael ei ymgorffori ym mhob pwnc ar draws y cwricwlwm. Bydd y Rhaglen hefyd yn caniatáu i athrawon fonitro cynnydd disgyblion yn unol â’r disgwyliadau ar gyfer llythrennedd erbyn diwedd y flwyddyn - gan helpu ysgolion i weld pa ffordd sydd oriau i herio a chefnogi pob un o’u dysgwyr.
Agwedd bwysig arall ar y rhaglen fydd cyflwyno profion darllen Saesneg a Chymraeg ar gyfer dysgwyr rhwng blwyddyn 2 a blwyddyn 9. Bydd y profion yn fodd i roi i athrawon, rhieni a gofalwyr ddarlun mwy cywir o allu disgybl i ddarllen drwy helpu i weld eu cryfderau a’u gwendidau unigol.
Wrth lansio’r Rhaglen yn Ysgol Cwm Garw lle mae’r athrawon wedi defnyddio nifer o gynlluniau i wella llythrennedd, dywedodd y Gweinidog:
"Mae gwella lefelau llythrennedd a rhifedd yn un o brif ymrwymiadau ein Rhaglen Lywodraethu. Does dim yn bwysicach na sicrhau bod gan ein pobl ifanc y sgiliau sydd eu hangen arnyn nhw i ddarllen, ysgrifennu a chyfathrebu.
"Mae enghreifftiau lu o waith addysgu a dysgu gwych ym maes llythrennedd ar draws Cymru. Mae Ysgol Cwm Garw eisoes yn arwain y ffordd drwy ddefnyddio dulliau addysgu gwahanol mewn ffordd sy’n llawn dychymyg ac mewn ffordd ddeallus.
"Mae’n rhaid i ni sicrhau y bydd pob un o’n dysgwyr yn elwa ar waith addysgu llythrennedd sy’n rhagorol a’u bod yn datblygu’r sgiliau sydd mor hanfodol i’w llwyddiant yn y dyfodol.
"Bydd y Rhaglen Llythrennedd Genedlaethol yn sicrhau mwy o gysondeb ac eglurder yn ein ffordd o dracio cynnydd disgyblion a hefyd yn sicrhau’r cymorth, yr her a’r atebolrwydd sydd eu hangen yn ein hysgolion ar yr un pryd."
