Milfeddygon a ffermwyr yn cydweithio i fynd i’r afael â TB gwartheg

Dyma’r ail flwyddyn i’r ymweliadau hyn, sydd wedi’u hariannu gan Lywodraeth Cynulliad Cymru, gael eu cynnig fel rhan o’r ymdrechion i fynd i’r afael â TB gwartheg yn yr Ardal Triniaeth Ddwys.  Eleni, mae’r cynnig o ymweliadau wedi’u hymestyn i ffermwyr sydd ag eiddo ychydig y tu allan i ffiniau’r ardal gweithredu dwys, ble y bwriedir cynllunio dull cynhwysfawr o fynd i’r afael â Dileu TB.  

Mae ceidwaid gwartheg cymwys wedi derbyn llythyr i’w hysbysu y bydd rhywun yn cysylltu â hwy dros yr hydref a’r gaeaf i drefnu apwyntiad i adolygu ac asesu eu harferion bioddiogelwch.  Milfeddygon y ffermwyr fydd yn ymweld.  

Mae gwella bioddiogelwch yn hanfodol i ddiogelu buchesi  rhag TB gwartheg trwy gyfyngu ar gyfleoedd i heintiau gael eu trosglwyddo rhwng gwartheg, a rhwng bywyd gwyllt a gwartheg.  

Meddai Dr. Christianne Glossop, Prif Swyddog Milfeddygol Cymru:  

“Mae bioddiogelwch yn agwedd bwysig o’n dull cynhwysfawr o fynd i’r afael â TB gwartheg.  Y llynedd, roedd pob un o’r ffermwyr gafodd gynnig ymweliadau wedi’u derbyn, a chafodd y cynnig ei ymestyn i ffermwyr oedd ychydig y tu allan i ffin yr Ardal Gweithredu Dwys.  

"Hoffwn annog ceidwaid gwartheg i dderbyn y cynnig o ymweliad.  Nid yw’n costio dim ond eich amser, a bydd yn helpu i leihau’r risg o gyflwyno heintiau i’ch buches.”  

Meddai Robert Price-Jones, un o’r milfeddygon lleol fydd yn gwneud yr ymweliadau:
 
"Mae’r ymweliadau hyn yn gyfle da i mi fel milfeddyg eistedd i lawr gyda’m cleient i dreulio amser penodol yn ail-werthuso  arferion presennol.  Mae’n bwysig iawn bod ceidwaid gwartheg yn ystyried y camau ymarferol y gallant eu cymryd i ddiogelu eu buchesi a’u busnes.  

"Nid oes gwarant y bydd bioddiogelwch yn sicrhau na fydd y fuches yn cael ei heintio gan TB, ond mae cadw’r clefyd allan yn ei gwneud yn fwy tebygol y bydd y fuches cadw’n iach, ac yn parhau i fod yn iach.”  

Yn dilyn pob ymweliad, bydd cynllun gweithredu wedi’i deilwra yn cael ei baratoi ar gyfer pob ceidwad gwartheg, gan gynnig canllawiau ar fesurau i leihau’r risg o TB gwartheg ar ffermydd unigol, trwy ddiogelu eu buchesi rhag cael eu heintio gan wartheg a bywyd gwyllt arall.  I ffermwyr gafodd ymweliad y llynedd, bydd ymweliad eleni yn rhoi cyfle i adolygu’r cynllun hwnnw, ac i adeiladu arno.  

Roedd yr argymhellion oedd yn dilyn ymweliadau llynedd yn cynnwys cyfyngu ar y cysylltiad rhwng anifeiliaid trwy:  

• Wneud llety gwartheg a storfeydd bwyd yn ddiogel rhag moch daear;
• Defnyddio cafnau gydag ochrau ar oleddf a’u codi o leiaf 3 troedfedd o’r llawr;
• Pori da byw nad ydynt yn debygol o gael yr haint ar feysydd ble mae moch daear yn bresennol.  

Mae mesurau i reoli clefydau gwartheg yn well, gan gynnwys profi gwartheg am TB bob chwe mis, a chyfyngu symudiadau i mewn ac allan o’r Ardal Gweithredu Dwys wedi’i sefydlu ers 1 Mai.  

Mae Llywodraeth Cynulliad Cymru hefyd yn cynnal dau ymgynghoriad cyhoeddus ar hyn o bryd ar TB.  Mae un yn gysylltiedig â TB mewn geifr, camelidau a cheirw ledled Cymru.  Mae’r llall yn gysylltiedig â Gorchymyn yn caniatáu i Lywodraeth Cynulliad Cymru ladd moch daear yn yr Ardal Gweithredu Dwys.  

Rhannu

Delicious

Digg

reddit

Facebook

Dolenni

Tagiau

Newyddion yn ôl chwiliad

Newyddion yn ôl pwnc

• Y Gogledd
• Y Canolbarth
• Y De-orllewin
• Y De-ddwyrain
• Cymru Gyfan