Hwb o £4 miliwn i fusnesau bwyd a choedwigaeth

Gwnaed y cyhoeddiad heddiw gan Alun Davies, y Dirprwy Weinidog Amaethyddiaeth, Pysgodfeydd, Bwyd a Rhaglenni Ewropeaidd. Dywedodd y bydd yr arian yn cael ei rannu rhwng y Cynllun Grant Prosesu a Marchnata a’r Cynllun Arbedion yn y Gadwyn Gyflenwi, sy’n rhan o Gynllun Datblygu Gwledig Cymru 2007-13

Mae tua £2 filiwn ar gael ar gyfer bob Cynllun ac fe fydd yn cael ei ddosbarthu drwy rownd ceisiadau cystadleuol.

Dywedodd Mr Davies bod yr hwb yn un pwysig:

“Mae’r ddau gynllun wedi bod yn llwyddiannus iawn wrth helpu busnesau i ddatblygu a marchnata cynnyrch newydd ac adeiladu a datblygu cadwyni cyflenwi lleol sy’n helpu i ledaenu’r buddiannau economaidd yn ehangach yn ein cymunedau gwledig.

“Rwy’n falch iawn o gyhoeddi’r arian ychwanegol hwn heddiw. Mae wedi’i gynllunio i helpu busnesau i fod yn fwy cystadleuol a chynaliadwy drwy ddatblygu cynnyrch newydd a chyrraedd at farchnadoedd newydd, gan greu a diogelu swyddi ac annog cydweithio rhwng cwmnïau.”

Rhagwelir y bydd galw mawr am y grant ac mae busnesau’n cael eu gwahodd i gyflwyno argymhellion ar-lein ar gyfer buddsoddiadau newydd neu ychwanegol.

Bydd y ceisiadau’n cael eu hasesu yn erbyn meini prawf sy’n cynnwys buddiannau economaidd, creu swyddi, a’r cyfraniad tuag at amcanion y Cynllun Datblygu Gwledig.

Gall busnesau BBaCh cymwys gyflwyno argymhellion ar gyfer prosiectau newydd drwy’r Cynllun Grant Prosesu a Marchnata.  O ran y Cynllun Arbedion yn y Gadwyn Gyflenwi, gall noddwyr prosiectau cyfredol a newydd gyflwyno ceisiadau ar gyfer prosiectau newydd neu weithgareddau newydd a fydd yn ychwanegu gwerth i brosiect cyfredol.

Rhannu

Delicious

Digg

reddit

Facebook

Dolenni

Tagiau

Newyddion yn ôl chwiliad

Newyddion yn ôl pwnc

• Y Gogledd
• Y Canolbarth
• Y De-orllewin
• Y De-ddwyrain
• Cymru Gyfan