Llywodraeth Cymru | Dynodi 29 man tawel trefol yn y De

Hafan > Newyddion > Yr amgylchedd a chefn gwlad > 2012 > Dynodi 29 man tawel trefol yn y De

Cofrestrwch ar gyfer y canlynol: Cylchlythyr | Newyddion

Dynodi 29 man tawel trefol yn y De

Mae Gweinidog yr Amgylchedd, John Griffiths, wedi dyfarnu statws ‘man tawel’ i 29 o leoliadau trefol ar draws De Cymru. Unwaith y bydd man tawel wedi’i ddynodi, caiff ei amddiffyn rhag unrhyw gynnydd mewn sŵn, drwy’r Gyfarwyddeb Sŵn Amgylcheddol a’r polisi cynllunio.

Dydd Mercher 23 Mai 2012

Yn gynharach eleni, gwahoddwyd pedwar awdurdod lleol, sef Castell-nedd Port Talbot, Abertawe, Bro Morgannwg a Chaerdydd, i gyflwyno rhestrau o’u mannau tawel dewisol. Yn dilyn cyfnod o ymgynghori, penderfynwyd rhoi statws ‘man tawel’ swyddogol i leoliadau cyhoeddus a pharciau mawr fel Parc y Mynydd Bychan, Caerdydd, Parc Cwmdonkin Abertawe ac adfeilion Abaty Glyn-nedd.

Dywedodd Gweinidog yr Amgylchedd, John Griffiths:

“Mae’n bleser mawr gen i roi’r statws hwn i bob un o’r mannau a gynigiwyd gan yr awdurdodau lleol. Yn gynharach yn y mis, siaradais am fy ngweledigaeth i ar gyfer gwella ardaloedd trefol Cymru ac mae’n hollbwysig darparu llecynnau gwyrdd tawel er mwyn gwireddu hynny. Mae’n bwysig bod pobl sy’n byw ac yn gweithio mewn ardaloedd trefol prysur yn cael hamddena, gorffwys ac ymlacio mewn mannau heddychlon gyda ffrindiau a theulu.

“Mae llawer o’r mannau y buom yn ymgynghori arnynt yn gartref i adar a bywyd gwyllt arall. Mae Llywodraeth Cymru’n gwerthfawrogi pwysigrwydd y mannau hyn i’w cymdogaethau ac rydyn wedi ymrwymo i’w diogelu ar gyfer y dyfodol.”

Y mannau hyn yw’r rhai cyntaf i gael eu dynodi mewn ardaloedd trefol mawr o dan y Gyfarwyddeb Sŵn Amgylcheddol (2002/49/EC). Mae’r Gyfarwyddeb yn gosod gofyniad ar Lywodraeth Cymru i ddynodi mannau tawel yn eu cynlluniau gweithredu ar sŵn ac mae rhoi Cyfarwyddebau Ewropeaidd ar waith yn un o ymrwymiadau’r Rhaglen Lywodraethu.

Bro Morgannwg

Belle Vue Park
Penarth Head Lane
Victoria Playing Fields
Golden Gates
Alexandra Park

Caerdydd

Heath Park
Thompson’s Park
Parc Caedelyn
Roath Park (wild gardens, lake and botanical gardens)
Roath Park Pleasure Gardens
Roath Park Recreation Ground

Abertawe

Cwmdonkin Park
Dunvant Park
Fendrod Lake
Parc Llewellyn
Morriston Park
Oystermouth Cemetery
Ravenhill Park
Underhill Park

Cyngor Casell-nedd Port Talbot

Talbot Memorial Park
Vivian Park
Neath Abbey Ruins
Mount Pleasant Park, Melin
Skewen Park
Shelone Woods
Baglan Park
Victoria Gardens
Church Place
King George V Park, Pontardawe

Cynhelir ail rownd y broses mapio sŵn yn ddiweddarach eleni, ac wedi hynny bydd ymgynghoriad ar ail gyfran o fannau tawel, gan gynnwys ardal Casnewydd y tro hwn.