Cyfres newydd o daflenni’n hyrwyddo Llwybr Arfordir Cymru

Agorodd y Gweinidog y Llwybr yn swyddogol ym mis Mai, sy’n golygu mai Cymru yw’r wlad gyntaf erioed i gael llwybr di-dor ar hyd ei harfordir. Disgwylir i’r llwybr 870 milltir o hyd ddenu 100,000 o ymwelwyr y flwyddyn.

Ymwelodd y Gweinidog â stondin Cyngor Cefn Gwlad Cymru yn yr Eisteddfod Genedlaethol i lansio wyth o daflenni newydd, a phob un yn sôn am wahanol rannau o’r Llwybr.

Wrth siarad yn yr Eisteddfod, dywedodd y Gweinidog:

“Bydd yr wybodaeth yn y taflenni’n helpu i greu mwy o gyhoeddusrwydd ar gyfer Llwybr Arfordir Cymru a bydd yn denu mwy o ymwelwyr ledled y wlad ac wrth gwrs yma i’r Fro. Bydd cymunedau arfordirol yn manteisio ar y cynnydd hwn yn niferoedd yr ymwelwyr, ac rydyn ni’n disgwyl i’r diwydiant twristiaeth fanteisio ar y Llwybr ar hyd a lled yr arfordir.

“Yn ôl Arolwg gan Croeso Cymru, mae tua chwarter y busnesau twristiaeth ar hyd yr arfordir wedi dweud bod agor Llwybr Arfordir Cymru ar 5 Mai wedi cael dylanwad positif ar eu busnesau.”

Bydd yr argraffiad cychwynnol o 7,000 o daflenni’n cael eu dosbarthu i ganolfannau croeso ledled Cymru. Byddant hefyd ar gael mewn archfarchnadoedd, gorsafoedd petrol, mannau twristiaeth, lletyau a mannau trafnidiaeth.

Bu Llywodraeth Cymru’n gweithio mewn partneriaeth â Chyngor Cefn Gwlad Cymru (CCW), un ar bymtheg o awdurdodau lleol a dau Barc Cenedlaethol i ddatblygu Llwybr Arfordir Cymru.

Mae Llywodraeth Cymru wedi buddsoddi hyd at £2 filiwn y flwyddyn er 2007 i wireddu ei huchelgais i greu llwybr 870 milltir o hyd sy’n mynd yr holl ffordd o amgylch arfordir Cymru. Cafwyd buddsoddiad gwerth £4 miliwn gan Gronfa Datblygu Rhanbarthol Ewrop dros gyfnod o bedair blynedd i gyflawni’r nod.

Rhannu

Delicious

Digg

reddit

Facebook

Dolenni

Gwefannau

Tagiau

Newyddion yn ôl chwiliad

Newyddion yn ôl pwnc

• Y Gogledd
• Y Canolbarth
• Y De-orllewin
• Y De-ddwyrain
• Cymru Gyfan