Llywodraeth Cymru | Cynllun Cydraddoldeb Unigol i yrru newid cadarnhaol

Hafan > Newyddion > Cydraddoldeb ac amrywiaeth > 2008 > Cynllun Cydraddoldeb Unigol i yrru newid cadarnhaol

Cofrestrwch ar gyfer y canlynol: Cylchlythyr | Newyddion

Cynllun Cydraddoldeb Unigol i yrru newid cadarnhaol

Bydd Cynllun Cydraddoldeb Unigol Llywodraeth Cynulliad Cymru yn gosod meincnod ar gyfer sut mae’r sector cyhoeddus yn hyrwyddo cydraddoldeb ac yn ymdrin â phob math o wahaniaethu, meddai Dr Brian Gibbons, y Gweinidog dros Gydraddoldeb, heddiw.

Dydd Mercher 19 Mawrth 2008

Mae’r cynigion ar gyfer Cynllun Cydraddoldeb Unigol, sy’n cael eu rhyddhau heddiw er mwyn ymgynghori yn eu cylch, yn nodi ymrwymiad eglur Llywodraeth y Cynulliad i hyrwyddo amrywiaeth a chydraddoldeb fel rhan annatod o’r ffordd y mae’n cyflawni busnes. Mae’n pwysleisio sut mae Llywodraeth y Cynulliad yn bwriadu gweithio gyda sefydliadau partner, fel Awdurdodau Lleol a’r GIG, i ymdrin ag anghydraddoldeb a gwella amgylchiadau pawb y mae’n eu cynrychioli ac yn eu gwasanaethu.

Bydd y Cynllun terfynol, a fydd ar waith am dair blynedd, yn adeiladu ar y seiliau a osodwyd gan gynlluniau cydraddoldeb anabledd, hil a rhyw presennol Llywodraeth y Cynulliad. Bydd hefyd yn cynnwys tri maes cydraddoldeb ychwanegol, sef crefydd a chred, oedran, a chyfeiriadedd rhywiol, a nodwyd yn Neddf Cydraddoldeb 2006.

Wrth gyhoeddi’r ymgynghoriad, meddai Dr Brian Gibbons:

Fel y Gweinidog â chyfrifoldeb dros Gydraddoldeb a Hawliau Dynol, fy swyddogaeth yw hyrwyddo a hwyluso mwy o gydraddoldeb, gan sicrhau bod y polisïau a ddatblygir gennym fel llywodraeth, ar y cyd â’n partneriaid, yn darparu gwasanaethau gwell i bob dinesydd. Mae cydlyniant cymunedol yn rhan allweddol o’r agenda hon, a dyna pam rwy’n awyddus i hyrwyddo gwerthoedd a rennir a chymunedau cydlynus ledled Cymru.

Yn y ddogfen ymgynghori hon, rydym wedi ceisio nodi polisïau ledled y llywodraeth sy’n gwneud gwahaniaeth gwirioneddol i fywydau pobl, gan sicrhau bod cydraddoldeb wrth wraidd pob un. Bydd y Cynllun hefyd yn seiliedig ar egwyddorion hawliau dynol.

Trwy ddatblygu ein Cynllun Cydraddoldeb Unigol, gobaith Llywodraeth Cynulliad Cymru yw gosod esiampl i bob awdurdod cyhoeddus yng Nghymru a datblygu newid cadarnhaol hirdymor.

Rwyf am glywed pobl yn lleisio’u barn am ein dogfen ymgynghori, a byddwn yn trefnu cyfres o ddigwyddiadau ledled Cymru fel rhan o’r broses hon.

19 Mawrth 2008