Llywodraeth Cymru | Y Prif Weinidog yn ymweld ag United Aerospace

Hafan > Newyddion > Prif Weinidog Cymru > 2012 > Y Prif Weinidog yn ymweld ag United Aerospace

Cofrestrwch ar gyfer y canlynol: Cylchlythyr | Newyddion

Y Prif Weinidog yn ymweld ag United Aerospace

Bydd cynhyrchiant United Aerospace Ltd yn derbyn hwb sylweddol wrth i’r cwmni fuddsoddi mewn technoleg, diolch i gymorth gan Gronfa Twf Economaidd Llywodraeth Cymru. Bydd y buddsoddiad hefyd yn helpu i ddiogelu swyddi’r cwmni hyd y gellir ei ragweld i’r dyfodol.

Dydd Mawrth 03 Ebrill 2012

Y Prif Weinidog Carwyn Jones a Cyfarwyddwr United Aerospace, Steven Cooper

Yn ystod ymweliad â’r busnes yn Noc Penfro heddiw roedd yn bleser gan Carwyn Jones y Prif Weinidog gyhoeddi y byddai’r cwmni yn derbyn gwerth £140,000 o gymorth ariannol o’r Gronfa,

"Mae United Aerospace Ltd yn enghraifft wych o fusnes hynod o arloesol o Gymru sydd â’r gallu i ddod yn fwy effeithlon a chystadleuol, o dderbyn cymorth ariannol. Mae hyn yn hollbwysig yn yr hinsawdd economaidd anodd sydd ohoni.

"Rwy’n eithriadol o falch o fod wedi cael cyfle i weld gwaith y cwmni â’m llygaid fy hun. Rwyf hefyd yn falch fod Llywodraeth Cymru yn gallu cefnogi’r prosiect hwn er mwyn diogelu a chreu swyddi yn y Gorllewin."

Dywedodd Gareth Burks, Rheolwr Gyfarwyddwr y busnes yn Noc Penfro, fod cymorth y Gronfa Twf Economaidd yn anhepgor er mwyn sicrhau bod y prosiect yn gweld golau dydd.

"Mae’n golygu ein bod yn gallu buddsoddi mewn offer newydd, arbenigol dros ben. Bydd hynny’n ein galluogi i gynyddu ein cynhyrchiant, yn ogystal â chreu nwyddau mwy cymhleth, er mwyn diwallu gofynion y contractau sydd gennym a denu busnes newydd.

"Golyga hefyd y byddwn yn gallu cystadlu â chwmnïau mwy a chwmnïau sydd wedi hen ennill eu plwyf ym mhob cwr o’r byd. Bydd hynny’n diogelu swyddi ein gweithwyr hyd y gellir ei ragweld, yn ogystal â chreu mwy o swyddi yn y dyfodol."

Yn ogystal â diogelu swyddi, bydd y prosiect hefyd yn creu wyth swydd newydd yn ystod y flwyddyn gyntaf.

Dylunio, cynhyrchu a gorffennu cydrannau cyfansawdd o wydr a ffibr carbon wedi’i atgyfnerthu yw gwaith United Aerospace Ltd, a hynny ar gyfer amrywiaeth eang o feysydd yn cynnwys y diwydiant awyrofod, y diwydiant amddiffyn, y sector meddygol a’r diwydiant ynni adnewyddadwy.

Sefydlwyd y cwmni yn 2004 ar ôl i’r rheolwyr lwyddo i’w brynu oddi wrth y perchenogion blaenorol. Erbyn hyn mae wedi tyfu i fod y cwmni mwyaf o’i fath yng Nghymru ac ymhlith y pump uchaf yn y DU.