Llywodraeth Cymru | Syr Richard Branson yn cefnogi cynlluniau rhoi organau Llywodraeth Cymru

Hafan > Newyddion > Iechyd a gofal cymdeithasol > 2011 > Syr Richard Branson yn cefnogi cynlluniau rhoi organau Llywodraeth Cymru

Newyddion

Cofrestrwch ar gyfer y canlynol: Cylchlythyr | Newyddion

Syr Richard Branson yn cefnogi cynlluniau rhoi organau Llywodraeth Cymru

Mae sylfaenydd Virgin, Syr Richard Branson, wedi llongyfarch y Gweinidog Iechyd Lesley Griffiths ar gynlluniau Llywodraeth Cymru i gyflwyno system feddal o optio allan ar gyfer rhoi organau.

Dydd Llun 19 Rhagfyr 2011

Wrth siarad â’r Gweinidog yn ddiweddar, dywedodd Syr Richard:

“Rwy’n falch iawn bod Cymru yn bwriadu arwain y ffordd ym Mhrydain trwy gyflwyno system optio allan ar gyfer rhoi organau.

“Bydd hynny’n achub llawer o fywydau. Ar draws Prydain, mae 90% o’r boblogaeth yn cefnogi’r syniad o roi organau, ond dim ond 29% sydd ar y gofrestr. Mae system optio allan yn ei gwneud yn hawdd i bawb gytuno i roi eu horganau oni bai eu bod yn defnyddio’u hawl i beidio â gwneud hynny.

“Da iawn Cymru. Gobeithio y bydd yr Alban a Lloegr yn dilyn yn fuan er mwyn achub mwy o fywydau.”

Dywedodd Lesley Griffiths:

“Mae pobl yng Nghymru yn marw wrth aros i gael trawsblaniad. Bydd system optio allan yn cynyddu nifer y rhoddwyr organau yng Nghymru, ac yn achub mwy o fywydau, gan wella ansawdd bywyd pobl hefyd.

“Mae’n help cael rhywun adnabyddus i gefnogi ein polisi, a’r disgwyl yw y bydd y polisi hwnnw yn ei le erbyn 2015.

“Hyd nes bod hynny’n digwydd, mae’n bwysig iawn bod pobl yn parhau i ymuno â’r Gofrestr Rhoddwyr Organau, gan wneud yn siŵr bod eu teulu a’u ffrindiau yn gwybod beth yw eu dymuniadau.

“Ar hyn o bryd, rydym wrthi’n ymgynghori ar ein cynigion, a hoffwn annog pawb sydd am roi sylwadau i wneud hynny cyn diwedd mis Ionawr.”