Llywodraeth Cymru | Gwobrau i weithleoedd iach trwy Gymru

Hafan > Newyddion > Iechyd a gofal cymdeithasol > 2012 > Gwobrau i weithleoedd iach trwy Gymru

Cofrestrwch ar gyfer y canlynol: Cylchlythyr | Newyddion

Gwobrau i weithleoedd iach trwy Gymru

Mae cyflogwyr o bob rhan o Gymru wedi cael eu gwobrwyo am eu gwaith yn cynnal a gwella iechyd a lles eu staff yn y gweithle.

Dydd Gwener 30 Mawrth 2012

Mae gwobrau Cymru Iach ar Waith yn cynnwys y Safon Iechyd Corfforaethol a Gwobr Iechyd y Gweithle Bach.

Y Safon Iechyd Corfforaethol yw’r nod ansawdd cenedlaethol ar gyfer iechyd a lles yn y gweithle i fusnesau a sefydliadau sy’n cyflogi mwy na 50 o staff; mae Gwobr Iechyd y Gweithle Bach ar gyfer gweithleoedd llai.

Cyflwynwyd y gwobrau gan Lesley Griffiths, y Gweinidog Iechyd, mewn seremoni arbennig yng Nghaerdydd yr wythnos diwethaf.

Meddai Lesley Griffiths:

“Mae’r gwobrau hyn yn adlewyrchu ymdrechion yr unigolion ymroddgar yn y busnesau a’r sefydliadau hyn i osod iechyd wrth galon eu gwaith.

“Mae’n galonogol bod llawer o gyflogwyr yn cydnabod pwysigrwydd gweithlu iach, yn enwedig yn yr hinsawdd economaidd heriol hwn. Maent yn ysbrydoliaeth i gyflogwyr eraill, a fydd, gobeithio, yn dilyn ôl eu traed.”

Meddai Dr Tony Jewell, Prif Swyddog Meddygol Cymru:

“Mae Cymru Iach ar Waith, sef rhaglen Llywodraeth Cymru ar gyfer iechyd yn y gweithle, yn hyrwyddo’r syniad o ‘waith da’. Gwyddom y bydd gan ‘gyflogwyr da’ weithlu sy’n fodlon, yn iach ac yn gynhyrchiol, ac mae hyn yn cyfrannu at yr ymdrechion eangach i wella iechyd ein poblogaeth sydd o oedran gweithio. Mae hefyd yn cyfrannu at gyfoeth Cymru.”