Llywodraeth Cymru | Labordai pwrpasol yn “fagwrfa ar gyfer arloesi”

Hafan > Newyddion > Iechyd a gofal cymdeithasol > 2012 > Labordai pwrpasol yn “fagwrfa ar gyfer arloesi”

Cofrestrwch ar gyfer y canlynol: Cylchlythyr | Newyddion

Labordai pwrpasol yn “fagwrfa ar gyfer arloesi”

Mae Lesley Griffiths, y Gweinidog Iechyd a Gwasanaethau Cymdeithasol, wedi agor labordai newydd o’r radd flaenaf sydd wedi eu creu i sicrhau bod GIG Cymru yn defnyddio’r dechnoleg ddiweddaraf.

Dydd Llun 23 Ebrill 2012

Ymwelodd y Gweinidog â Labordai Ymchwil Gwybodeg Iechyd GIG Cymru sydd wedi symud i le pwrpasol yn yr Athrofa Gwyddor Bywyd ym Mhrifysgol Abertawe.

Mae’r labordai ymchwil wedi eu creu fel petaent yn ‘GIG mewn labordy’, sef cyfleuster diogel a hygyrch ar gyfer ymchwil i astudio profiad pobl ar eu taith fel cleifion, a sut y gellid gwella hynny trwy ddefnyddio technoleg.

Mae’r labordai’n gosod Cymru ar flaen y gad ym maes e-iechyd, ac yn nodi ffyrdd o wella gwasanaethau i gleifion.

Yn y labordai, mae nifer o leoliadau sy’n cynrychioli cartref y claf, meddygfa, ward ysbyty, gwasanaeth y tu allan i oriau, a fferyllfa.

Defnyddir y rhain i gynrychioli sefyllfaoedd pryd y bydd cleifion yn derbyn gofal, a lle mae modd profi’r technolegau newydd i’w defnyddio ym maes iechyd i weld a ydynt yn ddiogel, yn ddefnyddiol ac yn gallu rhyngweithredu.

Mae’r Labordai:

yn dwyn ynghyd staff gofal iechyd, ymchwilwyr a chwmnïau i ganfod dyfeisiadau gofal iechyd
yn gwneud y gorau o’r wybodaeth bresennol sydd gan y Brifysgol a GIG Cymru er mwyn datblygu’r economi e-iechyd
yn darparu cyfleoedd i gwmnïau yng Nghymru ddatblygu eu sgiliau a’u cynnyrch
yn galluogi dyfeisiadau i gael eu rhannu gan wasanaethau iechyd yn y DU ac yn fyd-eang

Dywedodd Lesley Griffiths, y Gweinidog Iechyd:

“Mae gan y labordai rôl amlswyddogaeth. Maent yn profi technolegau newydd ar gyfer GIG Cymru, ac yn gweithredu fel magwrfa ar gyfer arloesi, gan greu cydweithrediadau gyda diwydiannau lleol a chenedlaethol, a chreu economi gadarn ym maes e-Iechyd.

“Diolch i’r Rhaglen Hysbysu Gofal Iechyd, a’r gefnogaeth a gafodd honno gan y Labordai, rydym wedi dechrau newid tirlun technoleg gofal iechyd, a’i gwneud yn haws i’n meddygon a’n nyrsys ddarparu’r gofal gorau i gleifion.

“Mae hyn yn dangos sut mae modd sicrhau llwyddiannau mawr pan fo iechyd, academia, diwydiant a llywodraeth yn cydweithio.”