Llywodraeth Cymru | Dros £900,000 i adfywio cymunedau yn y Cymoedd

Hafan > Newyddion > Tai a chymunedau > 2010 > Dros £900,000 i adfywio cymunedau yn y Cymoedd

Cofrestrwch ar gyfer y canlynol: Cylchlythyr | Newyddion

Dros £900,000 i adfywio cymunedau yn y Cymoedd

Mae Jocelyn Davies AC, y Dirprwy Weinidog dros Dai ac Adfywio, wedi cyhoeedi y bydd cymunedau ar draws Ardal Adfywio Cymoedd y Gorllewin yn cael £936,437 gan Lywodraeth Cynulliad Cymru.

Dydd Iau 18 Tachwedd 2010

Gwnaeth y Dirprwy Weinidog y cyhoeddiad yn ystod ymweliad ag Ystad Fairyland yng Nghastell-nedd lle mae dau allan o’r 22 prosiect sydd wedi cael arian wedi’u lleoli. Cafodd y Dirprwy Weinidog y cyfle i weld lle bydd y ddau brosiect newydd wedi’u lleoli a chafodd gyfle i gwrdd â chynrychiolwyr o’r grwpiau cymunedol fydd yn elwa o’r arian.

Bydd Rhandir Cymunedol Fairyland yn derbyn £63,836. Bydd y prosiect hwn yn rhoi cyfleoedd i breswylwyr yr ystad dyfu eu llysiau eu hunain ac yn ogystal, bydd yn eu galluogi i gael adeilad cymunedol, adeilad y mae ei angen arnynt yn fawr, lle y byddant yn gallu cwrdd a gweithio gyda Phartneriaeth Cymunedau yn Gyntaf. Bydd prosiect Parth Ieuenctid Fairyland yn derbyn £8,000 a bydd y Parth yn lle i bobl ifanc sy’n byw ar yr ystad dreulio eu hamser sbâr.

Mae pum awdurdod lleol a naw cwm yn rhan o Ardal Adfywio Cymoedd y Gorllewin ac mae’r cyllid wedi cael ei ddyrannu ar draws yr ardal fel a ganlyn:

£152,000 ar gyfer dau brosiect yng Nghwm Llynfi;
£62,000 ar gyfer dau brosiect yng Nghwm Garw;
£224,926 ar gyfer pum prosiect yng Nghwm Tawe;
£148,321 ar gyfer pedwar prosiect yng Nghwm Nedd;
£349,190 ar gyfer naw prosiect yng Nghwm Aman a Chwm Gwendraeth,

Wrth gyhoeddi’r cyllid dywedodd y Gweinidog:

“Mae’n bleser gennyf gyhoeddi’r arian hwn ar gyfer y ddau brosiect ar hugain. Dengys amrywiaeth y prosiectau, nid yn unig yn nhermau lleoliad ond yn nhermau eu natur hefyd, fod gan Gymoedd y Gorllewin lawer o gyfleusterau a chyfleoedd i’w cynnig ac mae’n dangos sut yr ydym yn bwriadu helpu i wneud y mwyaf o’r ardal hefyd.

“Yn yr hinsawdd economaidd sydd ohoni, mae ardaloedd fel Cymoedd y Gorllewin yn debygol o gael eu taro’n galed iawn felly pleser o’r mwyaf gennyf yw cyhoeddi’r arian hwn ar gyfer y prosiectau er mwyn sicrhau ein bod yn gwneud cymaint ag y gallwn ni i fwrw ymlaen â’r gwaith a ddechreuwyd yn 2008.”