Newyddion trwy RSS
Derbyniwch ein cylchlythyr
Busnes a'r economi
Plant a phobl ifanc
Diwylliant a chwaraeon
Addysg a sgiliau
Yr amgylchedd a chefn gwlad
Cydraddoldeb ac amrywiaeth
Iechyd a gofal cymdeithasol
Tai a chymunedau
Gwella gwasanaethau cyhoeddus
Rhyngwladol
Llywodraeth leol
Pobl hŷn
Cynllunio
Cyfiawnder cymdeithasol
Ystadegau
Datblygu cynaliadwy
Twristiaeth
Trafnidiaeth
Y Gymraeg
Yn dod i ben yn fuan (2)
Ychwanegwyd yn ddiweddar (10)
Yn anffodus, mae'r ffigyrau yn dangos bod achosion o gam-drin domestig a thrais yn erbyn menywod yn cynyddu dros gyfnod yr ŵyl wrth i densiynau yn y cartref weithiau droi'n dreisgar. Felly mae'n hollbwysig bod y rheini sy'n dioddef yn ymwybodol o'r help sydd ar gael drwy ffonio Llinell Gymorth Cam-drin Domestig Cymru, sydd ar agor 24 awr y dydd, ar 0808 80 10 800.
Mae Llinell Gymorth Cam-drin Domestig Cymru ar agor 24 awr y dydd, bob diwrnod o'r flwyddyn. Mae'n darparu cyngor a chymorth cyfrinachol am ddim i fenywod, dynion a phlant sy'n profi camdriniaeth ddomestig. Y llynedd, deliodd y llinell gymorth â chyfanswm o 22,285 o alwadau, sef cynnydd o 176% er 2004. Mae nifer y galwadau y mae staff y llinell yn eu hateb yn dal i gynyddu. Rhwng mis Ebrill a mis Tachwedd eleni, derbyniwyd 15,386 o alwadau, sef cynnydd o 18% ers yr un cyfnod y llynedd.
Dros y Nadolig, mae nifer y galwadau i'r llinell yn cyrraedd uchafbwynt. Yn ystod mis Rhagfyr y llynedd, deliodd y llinell gymorth â 2,205 o alwadau, sef cyfartaledd o fwy na 71 galwad y dydd gan unigolion oedd yn dioddef camdriniaeth ddomestig.
Mae'r mathau o alwadau y mae staff y llinell yn eu hateb yn amrywiol iawn oherwydd bod cymaint o wahanol fathau o gamdriniaeth ddomestig; gall fod yn emosiynol, seicolegol, corfforol, rhywiol neu ariannol.
Mae Llywodraeth Cynulliad Cymru wedi ymrwymo i fynd i'r afael â thrais yn erbyn menywod a cham-drin domestig. Dyma pam y mae'r Gweinidog dros Gyfiawnder Cymdeithasol, Carl Sargeant, wedi addo parhau i warchod y gyllideb i fynd i'r afael â thrais yn erbyn menywod a cham-drin domestig. Mae'r gyllideb honno yn werth £4.4 miliwn yn 2011/12.
Meddai'r Gweinidog:
"Mae Llinell Gymorth Cam-drin Domestig Cymru yn cynnig gwasanaeth gwerthfawr, yn enwedig yn ystod mis Rhagfyr pan mae holl straen y Nadolig yn arwain, yn anffodus, at gynnydd sylweddol yn nifer y rheini sy'n dioddef o gamdriniaeth ddomestig.
"Yn aml, mae gormod o ofn neu gywilydd ar y rheini sydd wedi dioddef camdriniaeth ddomestig i sôn am hynny, a gall llinell gymorth benodol fel hon fod yn achubiaeth go iawn. I lawer o bobl, gwneud yr alwad gyntaf honno a siarad â dieithryn am eu problemau yw'r cam cyntaf i dorri'r cylch dieflig o drais yn y cartref.
"Mae'n hanfodol bod pobl yn deall bod unrhyw fath o gam-drin domestig yn drosedd, a'i fod yn gwbl annerbyniol. Felly, rydw i'n annog unrhyw un sydd mewn perthynas lle maent yn cael eu cam-drin i alw'r llinell gymorth am gyngor a chefnogaeth. Mae staff y llinell yno 24 awr y dydd i wrando. Does angen ichi wneud dim byd ond siarad."
Meddai Paula Hardy, Prif Weithredwraig Cymorth i Fenywod Cymru,
"Hyd yn oed pan fod popeth yn mynd yn iawn, gall y Nadolig fod yn gyfnod anodd i deuluoedd. Yn sydyn, mae pobl sydd ddim yn treulio mwy nag awr neu ddwy yng nghwmni ei gilydd bob dydd yn cael eu taflu ynghyd am ddyddiau bwygilydd.
"Mae cyfnod y Nadolig hefyd fod yn adeg pan mae lefelau straen, y defnydd o alcohol a dyled ar gynnydd. Os ydych chi'n byw mewn teulu lle mae camdriniaeth yn digwydd, weithiau gall y tensiynau yn sgil y materion hyn ffrwydro yn drais a chamdriniaeth."
