Llywodraeth Cymru | Tynnu sylw at fanteision ymaelodi ag undeb credyd ...

Hafan > Newyddion > Tai a chymunedau > 2011 > Tynnu sylw at fanteision ymaelodi ag undeb credyd

Cofrestrwch ar gyfer y canlynol: Cylchlythyr | Newyddion

Tynnu sylw at fanteision ymaelodi ag undeb credyd

Heddiw tynnodd Carl Sargeant, y Gweinidog Llywodraeth Leol a Chymunedau, sylw at fanteision ymuno ag undeb credyd. A hithau’n Ddiwrnod Rhyngwladol Undebau Credyd (dydd Iau 20 Hydref), dywedodd y Gweinidog fod undebau credyd yn ffordd ddiogel a chyfleus o gynilo yn ogystal â chynnig amrywiaeth o wasanaethau ariannol i’w haelodau.

Dydd Iau 20 Hydref 2011

Mae thema Diwrnod Rhyngwladol Undebau Credyd eleni, Creu Gwell Byd drwy Undebau Credyd, yn pwysleisio cyfraniad economaidd a chymdeithasol pwysig undebau credyd i’w cymunedau ledled y byd.

Ar hyn o bryd, mae 22 o undebau credyd ledled Cymru yn darparu gwasanaethau i fwy na 50,000 o aelodau. Mae Llywodraeth Cymru wedi ymrwymo i gefnogi a datblygu undebau credyd i ddarparu gwasanaethau i bobl sydd wedi’u heithrio’n ariannol oddi wrth y prif ddarparwyr.

Dywedodd Carl Sargeant,

“Mae nifer y bobl sy’n ymaelodi ag undebau credyd yng Nghymru yn parhau i dyfu, ac mae mwy na 50,000 o aelodau a chynilwyr ifanc yn mwynhau manteision perthyn i undeb credyd.

“P’un a yw pobl eisiau hyblygrwydd cynilo’r hyn y gallan nhw pryd y gallan nhw, neu gynilo’n rheolaidd i greu celc wrth gefn, mae manteision lawer yn dod o berthyn i undebau credyd.

“Fel aelod o undeb credyd, rydych chi’n gwybod bod eich arian yn saff ac yn rhan o Gynllun Digolledu Gwasanaethau Ariannol. Mae llawer o bobl hefyd yn hoffi’r syniad o gadw’u harian o fewn eu cymuned er lles eu hardal leol.

“Yn yr hinsawdd economaidd sydd ohoni, mae’n bwysicach nag erioed bod gwasanaethau ariannol fforddiadwy ar gael i bobl.”