Llywodraeth Cymru | Cyhoeddi aelodau newydd er mwyn ystyried adfywio Aberystwyth

Hafan > Newyddion > Tai a chymunedau > 2011 > Cyhoeddi aelodau newydd er mwyn ystyried adfywio Aberystwyth

Cofrestrwch ar gyfer y canlynol: Cylchlythyr | Newyddion

Cyhoeddi aelodau newydd er mwyn ystyried adfywio Aberystwyth

Mae Huw Lewis, Gweinidog Llywodraeth Cymru ar gyfer Adfywio wedi penodi dau aelod newydd i Fwrdd Partneriaeth Ardal Adfywio Aberystwyth. Penodwyd Chris Mackenzie-Grieve sef Cadeirydd presennol Siambr Fasnach Aberystwyth a Gerallt Davies, sef Cadeirydd Clwb Busnes Aberystwyth.

Dydd Gwener 16 Rhagfyr 2011

Yn ôl Mr Lewis, mae penodi’r ddau leol hyn i’r Bwrdd yn hwb ardderchog. Dwedodd;

“Mae Llywodraeth Cymru wedi ymrwymo dros £10 miliwn er mwyn helpu i adfywio Aberystwyth oherwydd rydym yn ei hystyried yn dref strategol sy’n gwasanaethu Ceredigion a’r Canolbarth. Mae’r Bwrdd Partneriaeth sydd eisoes yn gweithredu wedi cymryd camau breision dros y 18 mis diwethaf a bydd denu cynrychiolwyr o ddau o sefydliadau’r sector busnes yn y dref yn cryfhau gwaith y Bwrdd hyd yn oed yn fwy ac yn sicrhau bod potensial Aberystwyth yn cael ei wireddu.”

Yn ogystal â bod yn ddyn busnes lleol, mae Mr Mackenzie-Grieve hefyd yn Rheolwr Gyfarwyddwr ar ymgynghoriaeth reoli a bydd hynny’n brofiad da iddo ar gyfer y gwaith sy’n ei wynebu:

“Rwy’n hynod falch fy mod wedi cael y gwahoddiad i fod yn aelod o’r Bwrdd Partneriaeth fel cynrychiolydd y Siambr Fasnach. Er fy mod yn croesawu ymrwymiad Llywodraeth Cymru i’r dref rwyf yn ei ystyried yn rhywbeth fydd yn ysgogi llwyddiant ar gyfer tref Aberystwyth yn y blynyddoedd i ddod.”

Cred Gerallt Davies, sy'n ymgynghorydd ariannol a hefyd yn Gadeirydd Clwb Busnes Aberystwyth, fod potensial yn y dref sydd heb ei gyrraedd eto, a bod angen mynd ati i wireddu hynny:

“Mae’r rhaglen adfywio hon ar gyfer tref fel Aberystwyth yn mynd i wneud gwahaniaeth mawr. Yr hyn sydd angen i ni ei wneud yn awr yw sicrhau bod yr arian yn denu buddsoddiad ychwanegol ac yn rhoi sylfaen gadarn i ni er mwyn datblygu mentrau yn y dyfodol. Yn Aberystwyth, mae gennym ni’r syniadau a’r bobl i fwrw ymlaen â’r gwaith ac rwy’n edrych ymlaen at gyfrannu at y gweithgareddau amrywiol sy’n cael eu datblygu.”

Wrth groesawu’r ddau aelod newydd, gwnaeth Huw Lewis hefyd ddiolch i Vince Morgans am ei gyfraniad yn dilyn ei benderfyniad i’r roi’r gorau i’w waith ar y Bwrdd oherwydd ymrwymiadau gwaith eraill.