Troi Tai’n gartrefi, cronfa gwerth £5 miliwn

Mae Troi Tai’n Gartrefi: y Gronfa Benthyciadau Ailgylchadwy yn galluogi awdurdodau lleol i gynnig benthyciadau di-log i landlordiaid er mwyn iddynt fedru adnewyddu tai preswyl gwag sydd wedi dirywio fel bod y tai mewn cyflwr i’w gwerthu neu’u rhentu.

Bydd y benthyciadau yn cael eu had-dalu dros gyfnod penodol, a bydd modd defnyddio’r arian hwnnw ar gyfer benthyciadau ychwanegol er mwyn troi mwy o dai gwag yn gartrefi.

Dywedodd Huw Lewis, y Gweinidog Tai, Adfywio a Threftadaeth,

“Ar hyn o bryd, un o’r materion mwyaf sy’n wynebu’r sector tai yw’r prinder tai i’w gwerthu a’u rhentu. Nid yn unig y mae tai gwag yn gwastraffu adnoddau, yn enwedig ar adeg pan fo galw mawr am dai ond yn ogystal gall tai gwag ddenu fandaliaid ac annog ymddygiad gwrthgymdeithasol a gall hynny niweidio delwedd ein cymunedau.

“Bydd y gronfa hon yn gweithredu ledled Cymru. Bydd y gronfa o gymorth i ddiwallu’r angen am dai preswyl sydd mewn cyflwr da fel bod modd iddynt gael eu defnyddio fel cartrefi – mae yna alw mawr am y mathau hyn o dai. Hefyd, bydd y cynllun yn diwallu’r angen am waith yn y diwydiant adeiladu. Mae’r gronfa yn un o’r ymrwymiadau allweddol yn y Rhaglen Lywodraethu ac rwyf yn gobeithio y bydd yn cyfrannu at wella ein cymunedau ac yn rhoi mwy o gyfle i deuluoedd ddod o hyd i gartref addas.”

Gall landlordiaid a pherchnogion tai gwag wneud cais am y benthyciadau drwy’u hawdurdod lleol.

Rhannu

Delicious

Digg

reddit

Facebook

Dolenni

Tagiau

Newyddion yn ôl chwiliad

Newyddion yn ôl pwnc

• Y Gogledd
• Y Canolbarth
• Y De-orllewin
• Y De-ddwyrain
• Cymru Gyfan