Llywodraeth Cymru | Buddsoddi i arbed mwy na £6 miliwn

Hafan > Newyddion > Gwella gwasanaethau cyhoeddus > 2011 > Buddsoddi i arbed mwy na £6 miliwn

Cofrestrwch ar gyfer y canlynol: Cylchlythyr | Newyddion

Buddsoddi i arbed mwy na £6 miliwn

Rhannwyd pot arian gwerth £6.03 miliwn rhwng nifer o sefydliadau i’w helpu nhw i ddarparu gwasanaethau o’r radd flaenaf i’r cyhoedd ac a fydd yn cael eu cynnal mor effeithlon â phosib.

Dydd Mercher 22 Mehefin 2011

Mae Cronfa Buddsoddi i Arbed Llywodraeth Cymru'n rhoi cymorth i gyrff gwasanaethau cyhoeddus drawsnewid y ffordd y maent yn gweithio fel eu bod yn fwy effeithlon ac yn parhau i ddarparu gwasanaethau o ansawdd i bobl Cymru.

Mae'r Gweinidog Cyllid ac Arweinydd y T? wedi cytuno i ddyrannu cyllid yn 2011-12 i gefnogi cynigion a gyflwynwyd o dan bedwaredd cylch y Gronfa.

Dywedodd y Gweinidog Cyllid, Jane Hutt:

"Rwyf wrth fy modd ein bod yn gallu cynnig cymorth i'r sefydliadau hyn sy'n darparu gwasanaethau hanfodol i'r cyhoedd, fel eu bod yn cael y cyfle i weithio mor gost-effeithiol â phosib.

"Rydyn ni'n wynebu amseroedd ariannol anodd yng Nghymru. Felly, mae'n hanfodol bod y rhai sy'n darparu gwasanaethau cyhoeddus yn parhau i edrych am ffyrdd gwahanol o'u cyflenwi, gan sicrhau nad yw dulliau mwy cost-effeithiol yn golygu bod yr ansawdd yn dioddef. Mae ein dull unigryw ni o weithredu - yn arbennig drwy Fuddsoddi i Arbed, yn rhoi'r cymorth y mae ei angen ar gyrff cyhoeddus i ddatblygu a hyrwyddo eu prosiectau gwella er lles y cyhoedd."

Bydd yr arian diweddaraf hwn yn gweld £3 miliwn yn cael ei fuddsoddi, er enghraifft, i alluogi chwe sefydliad yn y Gogledd o blith llywodraeth leol, y gwasanaethau brys a'r bwrdd iechyd lleol i ymuno â Rhwydwaith Cydgasglu Band Eang y Sector Cyhoeddus (PBSA). Mae'r rhwydwaith diogel hwn yn unigryw i Gymru o fewn y DU a gall ddarparu cysylltiadau drwy ddefnyddio'r llais, fideo a data rhwng sefydliadau, a hynny am oddeutu 20% yn llai.

Neilltuwyd cyfanswm o £500,000 ar gyfer Bwrdd Iechyd Prifysgol Betsi Cadwaladr i dreialu meddalwedd adnabod llais digidol a fydd yn arbed 30% mewn costau, yn cyflymu'r cyfathrebu rhwng meddygon mewn ysbytai ac ymarferwyr cyffredinol ac yn arwain at wasanaethau gwell i gleifion.

Cyhoeddir cylch arall o'r Gronfa Buddsoddi i Arbed yn ddiweddarach yn ystod yr haf.