Y Gweinidog yn Cyhoeddi Enwau Aelodau Bwrdd Adfer Ynys Môn

Bydd y Bwrdd yn cynghori Llywodraeth Cynulliad Cymru ar adfer Cyngor Sir Ynys Môn o’r problemau difrifol y mae Archwilydd Cyffredinol Cymru wedi’u nodi mewn adroddiad a gyhoeddwyd ym mis Gorffennaf.

Dywedodd Dr Gibbons:  

“Rwy’n falch iawn fy mod wedi llwyddo i benodi'r Athro Elan Closs Stephens CBE i gadeirio’r Bwrdd adfer ac i benodi Sue Essex, Bill Horne, Richard Parry Hughes, Dr Zoë Radnor, Mel Usher a Graham Williams fel aelodau o’r Bwrdd.

“Mae hwn yn Fwrdd o’r radd flaenaf.  Mae gan aelodau’r bwrdd gryn ddealltwriaeth o broblemau rheoli yn y sector cyhoeddus ac mae’r ddealltwriaeth honno’n deillio o ystod eang o safbwyntiau.  Bydd eu harbenigedd yn ein cynorthwyo’n fawr i sicrhau adferiad cyflym a chynaliadwy rydym i gyd yn dymuno ei gael.

“Hefyd, rwy’n hapus iawn bod tri o aelodau’r Bwrdd - Elan, Richard a Graham - yn siarad Cymraeg yn rhugl.  Rwy’n cydnabod pwysigrwydd yr iaith Gymraeg o fewn y Cyngor ac ar yr ynys a bydd y penodiadau hyn yn sicrhau bod unrhyw un sy’n dymuno trafod materion gydag aelod o’r Bwrdd trwy gyfrwng y Gymraeg yn gallu gwneud hynny.

“Rôl cynghori fydd gan y Bwrdd a bydd yn rhaid i’r Cyngor weithio gyda’r Bwrdd Adfer.  Bydd yn monitro hynt y Cyngor tuag at adferiad ac yn unol â hynny, yn cysylltu â mi.  Hefyd, gall y Bwrdd Adfer gynghori’r Cyngor ar gamau posibl y gellir eu cymryd.  Fodd bynnag, mae’r cyfrifoldeb am adferiad yn disgyn ar ysgwyddau’r Cyngor.

Medi 16 2009

Rhannu

Delicious

Digg

reddit

Facebook

Dolenni

Tagiau

Newyddion yn ôl chwiliad

Newyddion yn ôl pwnc

• Y Gogledd
• Y Canolbarth
• Y De-orllewin
• Y De-ddwyrain
• Cymru Gyfan