Gwasanaethau lleol yn parhau i wella ond mae angen mwy o gysondeb

Mae’r Bwletin, a gyhoeddwyd gan Uned Ddata Llywodraeth Leol, yn dangos, er bod y rhan fwyaf o wasanaethau llywodraeth leol yn gwella, bod gwaith i’w wneud o hyd i gael awdurdodau lleol i gynnig yr un math o berfformiad.

Meddai Dr Gibbons:

"Rwy’n falch iawn bod Bwletin eleni yn rhoi negeseuon positif ynghylch safon gwasanaethau awdurdodau lleol. Mae’r data yn dangos bod awdurdodau lleol yn darparu gwasanaethau o safon, a bod gwelliant o flwyddyn i flwyddyn yn y rhan fwyaf o’r gwasanaethau.

"Mae awdurdodau lleol wedi gwneud cynnydd da mewn nifer o feysydd allweddol gan gynnwys:

• Cododd cyfraddau presenoldeb ysgolion am y tro cyntaf mewn sawl blwyddyn. Dangosodd 16 o awdurdodau welliant o rhwng 0.1% a 0.8% ond mae’n siom bod dau o’r awdurdodau oedd â’r cyfraddau isaf yn y flwyddyn ddiwethaf wedi gostwng ychydig mwy eleni.
• Bu gostyngiad sylweddol yn nifer y bobl sydd mewn gwelyau ysbytai gan nad oes unlle arall iddynt fynd gan na allant fyw’n annibynnol. Dangosodd Torfaen welliant o 14.3 fesul 1000 o’r boblogaeth 75 oed a throsodd, a gyda gostyngiad o 20.1 y flwyddyn flaenorol, mae hyn yn welliant sydd i’w groesawu’n fawr, o 46.8% yn 2006/7 i 12.4% yn 2008/9.
• Mae cyfartaledd yr amser sy’n cael ei gymryd i gwblhau newidiadau i gartrefi pobl gyda Grantiau Cyfleusterau’r Anabl wedi gostwng 32% dros y ddwy flynedd ddiwethaf. Fodd bynnag, mae’n amlwg yn bosibl i rai awdurdodau ddysgu gan eraill, gan bod yr amser ar gyfartaledd yn parhau i fod dros 2 flynedd mewn rhai ardaloedd.
• Dengys y dangosyddion gwastraff welliant sylweddol dros y dair blynedd ddiwethaf. Rydym bellach yn ailgylchu neu’n compostio dros un rhan o dair o’r holl wastraff, ac mae’r gwastraff bioddiraddiadwy a anfonwyd i safleoedd tirlenwi wedi gostwng dros 10% yn y dair blynedd ddiwethaf. Mae hefyd yn dda i weld bod yr holl awdurdodau lleol ar waelod y raddfa ailgylchu wedi dangos rhywfaint o welliant y llynedd, a Caerdydd a Blaenau Gwent yn dangos gwelliant sylweddol.

"Fodd bynnag, er bod llawer o bethau i’w croesawu wrth i berfformiad barhau i wella, dengys y data bod amrywiadau sylweddol yn parhau ymysg gwasanaethau o fewn a rhwng awdurdodau. Dengys hyn lle mae angen mwy o gynnydd.

"Y flwyddyn nesaf, rwy’n bwriadu creu nifer fechan o fesurau perfformiad sy’n olrhain cyfraniad Cynghorau i flaenoriaethau allweddol Llywodraeth y Cynulliad. Rwy’n gobeithio y bydd canolbwyntio mwy ar ganlyniadau i ddinasyddion yn hytrach nag ar fesurau mewnbwn sy’n seiliedig ar adnoddau yn helpu inni fodloni’r her o flaenoriaethu adnoddau cyfyngedig. Ar yr un pryd bydd yn helpu inni ddarparu gwasanaethau i’r safon yr ydym ni a’r dinasyddion yn ei ddymuno."

Mae'r bwletin, Perfformiad Awdurdodau Lleol 2008-9 ar gael ynghŷd â'r data llawn o wefan yr Uned Data Llywodraeth Leol 

1 Hydref 2009

Rhannu

Delicious

Digg

reddit

Facebook

Dolenni

Tagiau

Newyddion yn ôl chwiliad

Newyddion yn ôl pwnc

• Y Gogledd
• Y Canolbarth
• Y De-orllewin
• Y De-ddwyrain
• Cymru Gyfan