Chwilio am yr Eiriolwr Cyntaf dros Bobl Hŷn

Bydd y Comisiynydd yn chwarae rôl hanfodol wrth sicrhau bod gwasanaethau cyhoeddus, ar bob lefel, yn gallu cynnig y gwasanaeth gorau posibl i bobl hŷn, gan eu helpu i fyw bywyd i’r eithaf a sicrhau eu bod yn ddinasyddion sy’n cymryd rhan lawn yn y gymdeithas.

Credir mai hon yw’r swydd gyntaf o’i math yn y byd, a disgwylir i’r ymgeisydd llwyddiannus fod yn ei swydd erbyn diwedd y flwyddyn.

Dywedodd y Dirprwy Weinidog dros Iechyd a Gwasanaethau Cyhoeddus, Gwenda Thomas, y byddai’r Comisiynydd yn sicrhau bod diddordebau pobl hŷn yng Nghymru, sef pobl 60 mlwydd oed ac yn hŷn, yn cael eu diogelu a’u hyrwyddo:  

Fel llysgennad a llais awdurdodol ar faterion sy’n ymwneud â phobl hŷn, bydd y Comisiynydd yn siarad ar ran pobl hŷn ac yn eu helpu i ddatrys problemau pan aiff pethau o chwith

Mae’r demograffig yn newid, ac erbyn 2026 bydd tua 29 y cant o bobl Cymru yn 60 mlwydd oed ac yn hŷn. Bydd y penodiad hwn yn sicrhau bod pobl hŷn wrth graidd y broses o greu polisïau.

Rwyf wrth fy modd bod Cymru yn arwain y ffordd ac yn enghraifft i eraill. Cymru oedd y wlad gyntaf i benodi Comisiynydd Plant er mwyn rhoi llais cryfach i blant a phobl ifanc, ac yn awr, ni yw’r cyntaf i gael Comisiynydd i hyrwyddo diddordebau pobl hŷn.

Cydnabyddir yn eang fod Cymru yn arwain y byd wrth roi mwy o lais i bobl hŷn yn y broses o ddatblygu gwasanaethau. Bydd y Comisiynydd unigryw hwn yn atgyfnerthu enw da Cymru ymhellach.

Caiff y rôl ei chefnogi gan bwerau statudol a bydd yn galluogi’r Comisiynydd i:

• adolygu effaith gwasanaethau cymdeithasol ar bobl hŷn, a lle bo pethau’n mynd o chwith, edrych ar y rhesymau dros hyn a’r atebion;
• helpu i sicrhau bod pobl hŷn yn cael eu trin ag urddas a pharch a bod y cyfraniad enfawr y mae’r unigolion hyn wedi’i wneud yn cael ei werthfawrogi’n briodol; a,
• bod yn ffynhonnell o wybodaeth, eiriolaeth a chefnogaeth i bobl hŷn.

Meddai Cadeirydd Age Concern Cymru, Mr Mike Talbot:

Rydym wedi ymgyrchu’n hir ac yn daer i gael Comisiynydd o’r fath i roi’r sylw y mae dirfawr angen amdano i anghenion a hawliau pobl hŷn yng Nghymru.

Bydd Comisiynydd effeithiol yn helpu pobl hŷn i gael hawliau dynol sylfaenol  megis rhyddid rhag gwahaniaethu, mynediad cyfartal at wasanaethau iechyd a chymdeithasol, a chael eu diogelu rhag yr amryw ffurfiau o gam-drin.

Mae arnom eisiau i’r Comisiynydd newydd greu awyrgylch lle gall y bobl hŷn eu hunain ddylanwadu ar y ffordd y caiff gwasanaethau cyhoeddus a phreifat pwysig eu rheoli a’u darparu yng Nghymru.

18 Gorffennaf, 2007

Rhannu

Delicious

Digg

reddit

Facebook

Dolenni

Tagiau

Newyddion yn ôl chwiliad

Newyddion yn ôl pwnc

• Y Gogledd
• Y Canolbarth
• Y De-orllewin
• Y De-ddwyrain
• Cymru Gyfan