Rhagor yn cael manteisio ar y Gronfa Arallgyfeirio Swyddfeydd Post

Bydd y cyllid yn creu 57 o swyddi cyfwerth ag amser llawn mewn swyddfeydd post ledled Cymru. Hwn yw’r ail gylch cyllido, gyda’r nod o helpu is-bostfeistri i arallgyfeirio a gwella eu Swyddfeydd Post. Roedd cyfanswm o £1.1. miliwn wedi’i ddyfarnu eisoes i chwe deg tri o swyddfeydd post ym mis Gorffennaf.

Mae’r gronfa hon o £4.5 miliwn, a fydd yn agored am dair blynedd ac ar gael i bob is swyddfa’r post yng Nghymru, yn cynnig cymorth busnes a chyngor ar farchnata, hysbysebu, hyfforddiant a rhai o gostau sefydlu gwasanaethau newydd. Yn ogystal, gellir defnyddio’r cyllid i wella’r mynediad i adeiladau,  prynu cyfarpar cyfrifiadurol newydd, gwella diogelwch neu ddarparu arwyddion gwell tu allan i’r swyddfeydd post.

Yn Swyddfa Post y Glais ger Abertawe y gwnaeth y Dirprwy Weinidog y cyhoeddiad, a chafodd gyfle yno i weld sut y defnyddiwyd  yr arian arallgyfeirio i gynnal gwaith ailwampio ac agor becws ar y safle.

Mae deuddeg o Swyddfeydd Post wedi cael grantiau o hyd at £5,000 yr un ar gyfer mân brosiectau cyfalaf megis offer aerdymheru neu systemau diogelwch newydd ac mae chwe deg tri o swyddfeydd wedi cael hyd at £20,000 yr un i gynnal prosiectau mwy, megis adnewyddu’r adeilad, gwella mynediad neu osod cyfleusterau ar gyfer gwasanaethau newydd. Dyfarnwyd hyd at £15,000 o gyllid refeniw i dri deg pedwar o’r Swyddfeydd Post hefyd, er mwyn eu helpu i gyflogi staff newydd neu gynyddu oriau’r staff i ddarparu rhagor o wasanaethau.

Dywedodd y Dirprwy Weinidog:

“Yn aml iawn, Swyddfa’r Post yw calon y gymuned, ac rydym ni fel llywodraeth bob amser wedi cydnabod eu gwerth – yn enwedig o ran cefnogi pobl agored i niwed a darparu gwasanaethau hanfodol yn ein cymunedau mwyaf ynysig a difreintiedig.

“Rwy’n falch dros ben bod cynifer o Swyddfeydd Post ym mhob rhan o Gymru wedi gallu manteisio ar y gronfa hon, a  braf yw gweld bod yr arian eisoes yn gwneud gwahaniaeth i fusnesau a chymunedau fel ei gilydd. Mae’r busnesau hyn yr ydym yn eu cefnogi yn enghreifftiau rhagorol o’r modd y gall Swyddfeydd Post ddarparu pob math o wasanaethau eraill, ac rwy’n hapus iawn ag amrywiaeth y prosiectau sydd ar y gweill.

Yn y Glais, mae becws newydd y Swyddfa Post yn ychwanegiad gwerth chweil. Un o’r prosiectau eraill yr wyf wedi’u gweld yw caffi rhyngrwyd, sydd, yn ogystal â helpu i sicrhau dyfodol hirdymor y swyddfa post, yn cynnig adnodd gwerthfawr i’r gymuned ac yn ei gwneud yn haws i bobl fynd ar-lein os nad oes ganddynt gyfrifiadur gartref.

Dywedodd Huw Roberts, Cyfarwyddwr Materion Cymreig y Post Brenhinol:

“Mae un o bob saith Swyddfa Post wedi cael cymorth gan y Gronfa hon bellach. Rydym yn falch iawn i gydweithio â Llywodraeth y Cynulliad ar gynllun fel hwn, sy’n dod â budd i’r gymuned ac yn ychwanegu at y gwasanaeth a ddarparwn.”

7 Rhagfyr 2009

Rhannu

Delicious

Digg

reddit

Facebook

Dolenni

Tagiau

Newyddion yn ôl chwiliad

Newyddion yn ôl pwnc

• Y Gogledd
• Y Canolbarth
• Y De-orllewin
• Y De-ddwyrain
• Cymru Gyfan