Cynlluniau i wella cludiant ysgolion yng Nghymru wedi cymeradwyo

Dywedodd y Gweinidog dros yr Economi a Thrafnidiaeth bydda’r Mesur Trafnidiaeth Dysgwyr yn ehangu trafnidiaeth ysgol am ddim i blant ysgol gynradd, gwella diogelwch a chreu eglurder am ddarpariaeth trafnidiaeth ysgol am ddim yng Nghymru.

Y bwriad yw y bydd prif ddarpariaethau’r Mesur yn dod i rym o fis Medi 2009, ar ddechrau’r flwyddyn academaidd honno.

Dywedodd Mr Jones:

Mae’r Mesur hwn yn gam pwysig ymlaen i ni fel ein bod yn gallu diwallu ein hamcan yn nogfen Cymru’n Un i geisio diogelu rhagor o ddeddfwriaeth yn ymwneud â gwell cludiant i ysgolion.

Ni ddylai teithio rwystro plant a phobl ifanc rhag cymryd rhan mewn addysg. Mae trafnidiaeth effeithlon ac effeithiol yn gallu gwella mynediad at addysg a hefyd, mae’n gallu gostwng tagfeydd traffig. Bydd y Mesur yn egluro’r sefyllfa o ran yr hyn sy’n berthnasol i Gymru yn y maes hwn. Bydd y Mesur yn golygu na fyddwn yn gorfod ymateb i newidiadau ym maes teithio gan ddysgwyr yn Lloegr a byddwn yn gallu creu system teithio gan ddysgwyr sy’n addas i ni yma yng Nghymru.

Nod y Mesur yw mynd i’r afael â materion diogelwch trwy gyflwyno cod Gymru gyfan ar ymddygiad wrth deithio i’r ysgol neu wrth deithio i unrhyw sefydliad arall sy’n ymwneud â dysgu.

Dywedodd Mr Jones:

Er bod llawer o awdurdodau lleol yng Nghymru eisoes yn defnyddio codau ymddygiad er mwyn mynd i’r afael â materion yn ymwneud ag ymddygiad dysgwyr sy’n teithio, mae ein hymgynghoriad eang wedi dangos bod yna bryderon ynghylch y ffaith bod y codau hyn yn amrywio o un ardal i’r llall.

Mae angen inni ddefnyddio’r codau hyn mewn dull cyson ac mae angen i’r cod ymddygiad hwn fod yn berthnasol i bob taith sy’n gysylltiedig â dysgu os yw taith y dysgwr yn cael ei hariannu gan yr awdurdod lleol ai peidio.

Er nad yw’r Mesur yn gallu mynd i’r afael â materion yn ymwneud â rheoliadau ynghylch bysiau, materion fel gwahardd y defnydd o fysiau deulawr a gorfodi gwisgo gwregysau diogelwch, mae Mr Jones wedi cyhoeddi canllawiau ynglŷn â’r materion hyn ac mae wedi ailadrodd y ffaith ei fod yn benderfynol o geisio cael pwerau gan San Steffan fel bod modd rhoi’r materion hyn ar waith yma yng Nghymru. Mae trafodaethau eisoes wedi dechrau gyda Llywodraeth y DU.

Dywedodd:

Ni all y Mesur hwn ymdrin â’r materion hyn gan nad ydynt yn rhan o gymwyseddau deddfwriaethol y Cynulliad. Fodd bynnag, byddaf yn mynd ati i geisio cael rhagor o bwerau i’r maes hwn. Yn y cyfamser, rydym wedi cyhoeddi canllawiau newydd i’r awdurdodau lleol er mwyn eu hannog i ddefnyddio gwregysau diogelwch yn eu cerbydau ac i gynnal gwiriadau ar yrwyr ac i ystyried defnyddio system teledu cylch cyfyng a hebryngwyr ar deithiau gan ddysgwyr. Mae’r canllawiau hefyd yn eu hannog i beidio â defnyddio’r consesiwn lle caniateir i dri pherson eistedd ar sedd a fwriadwyd ar gyfer dau nac i ddefnyddio bysiau deulawr i deithio i’r ysgol ac oddi yno.

Bydd y Mesur yn sicrhau bod disgyblion ysgolion cynradd yn gymwys i gael teithio am ddim - os ydynt yn byw ddwy filltir neu fwy oddi wrth yr ysgol addas agosaf. O dan y ddeddfwriaeth bresennol, mae disgyblion o dan wyth oed yn gallu gwneud cais am drafnidiaeth am ddim os ydynt yn byw ddwy filltir neu fwy oddi wrth yr ysgol addas agosaf ac mae hyn yn codi i dair milltir i blant wyth oed neu hŷn.

Bydd y Mesur hefyd yn rhoi dyletswydd ar yr awdurdodau lleol i hyrwyddo mynediad at Addysg trwy Gyfrwng y Gymraeg ac mae’r Gweinidog wedi ailadrodd y ffaith y bydd yn defnyddio ei bwerau cyfarwyddo i roi’r mater hwn ar waith mewn sefyllfaoedd lle credir nad yw’r awdurdodau lleol yn cyflawni eu dyletswyddau.

30 Medi 2008

Rhannu

Delicious

Digg

reddit

Facebook

Dolenni

Tagiau

Newyddion yn ôl chwiliad

Newyddion yn ôl pwnc

• Y Gogledd
• Y Canolbarth
• Y De-orllewin
• Y De-ddwyrain
• Cymru Gyfan