Mynnwch ddweud eich dweud ar strategaeth iaith newydd i Gymru

Bydd y strategaeth yn llywio'r camau y bydd Llywodraeth Cynulliad Cymru yn eu cymryd i hybu a diogelu'r Gymraeg.  Bydd yn manteisio ar y cyfleoedd newydd a ddaw yn sgil Gorchymyn Cymhwysedd Deddfwriaethol yr iaith Gymraeg, a fydd yn caniatáu i'r Cynulliad Cenedlaethol ddeddfu ar yr iaith am y tro cyntaf. 

Mae'r Gorchymyn ar fin cyrraedd camau olaf ei daith, wedi iddo gael ei osod yn y Cynulliad ar 20 Hydref, cyn y ddadl ar 3 Tachwedd.

Meddai'r Gweinidog Treftadaeth:

"Mae Llywodraeth Cynulliad Cymru yn gofyn am bwerau i alluogi Cynulliad Cenedlaethol Cymru i ddeddfu er mwyn cadarnhau statws swyddogol y Gymraeg a'r Saesneg, sicrhau hawliau ieithyddol wrth dderbyn gwasanaethau a sefydlu swydd y Comisiynydd Iaith.

"Serch hynny, dim ond un rhan o'r jig-so yw gofyn i'r Cynulliad Cenedlaethol gael cymhwysedd deddfwriaethol yn y maes.  Wythnos diwethaf, lansiwyd y broses ymgynghori ar y strategaeth iaith newydd a fydd yn olynu Iaith Pawb.

"Roedd Iaith Pawb yn gam pwysig yn hanes y Gymraeg - y strategaeth genedlaethol gyntaf ar y Gymraeg gan unrhyw lywodraeth.  Ond mae dros chwe mlynedd wedi mynd ers iddi gael ei lansio ac mae byd y Gymraeg wedi newid yn sylweddol ers hynny.

"Felly mae'n bryd edrych ar yr hyn sydd angen ei wneud i hybu a hwyluso'r defnydd o'r iaith.  Hoffwn wahodd pawb i gael dweud eu dweud am yr elfennau eraill sy'n bwysig i bolisi iaith, er mwyn cyfrannu at y broses o ddatblygu strategaeth newydd."

Bydd yr ymgynghoriad yn ymdrin â phob math o faterion:

• defnyddio'r Gymraeg yn y teulu
• annog plant a phobl ifanc i ddefnyddio'r Gymraeg
• defnyddio'r Gymraeg fel iaith gymunedol
• prif ffrydio'r Gymraeg yng ngwaith cyrff cyhoeddus
• hybu'r Gymraeg yn y sector preifat a'r trydydd sector
• darllen, gwylio a gwrando ar y Gymraeg
• bod ag arfau wrth law i gefnogi'r defnydd o'r Gymraeg (gan gynnwys terminoleg, cyfieithu, technoleg ac ymchwil)
• marchnata'r iaith

Bydd cyfle i bobl ddweud eu dweud tan ddiwedd mis Ionawr 2010. 

20 Hydref 2009

Rhannu

Delicious

Digg

reddit

Facebook

Dolenni

Tagiau

Newyddion yn ôl chwiliad

Newyddion yn ôl pwnc

• Y Gogledd
• Y Canolbarth
• Y De-orllewin
• Y De-ddwyrain
• Cymru Gyfan