NAFWC 02/05 - Rhaglen datblygu'r gweithlu gofal cymdeithasol ar gyfer gwasanaethau cymdeithasol personol 2005-2006

14/05/2005

Darllenwch y cylchlythyr hwn i gyd yn ofalus. Dylech ddarllen y cylchlythyr ochr yn ochr â “Cynllunio ar gyfer Hyfforddi a Datblygu Staff ar draws y Sector Gofal Cymdeithasol ” (arweiniad i helpu awdurdodau lleol Cymru a’u partneriaid i wneud trefniadau effeithiol ar gyfer y sector gofal cymdeithasol yn eu hardal o ran hyfforddi a datblygu staff), a gyhoeddwyd gan Arolygiaeth Gwasanaethau Cymdeithasol Cymru ym mis Gorffennaf 2003. Disgwyliwn weld ceisiadau grant yn amlinellu’n glir y trefniadau ar gyfer Partneriaethau Rhaglen Datblygu’r Gweithlu Gofal Cymdeithasol ac yn cynnwys cynlluniau datblygu a hyfforddi staff clir ar gyfer y sector cyfan.

Bydd gwariant a gynlluniwyd ar gyfer Rhaglen Datblygu'r Gweithlu Gofal Cymdeithasol yn 2005-06 yn dod i gyfanswm o £8,928,570. Bydd yr elfen grant, sy'n darparu 70% o gost y rhaglen, yn £6,250,000. Mae rhaglen 2005-06 yn darparu ar gyfer cynnydd o £1,428,570 yng nghyfanswm y gwariant.

Mae’r ddarpariaeth ychwanegol yn cael ei rhoi er mwyn cynnig cymorth pellach i staff ennill y cymwysterau galwedigaethol a argymhellir, a pharhau i gyrraedd Targedau Hyfforddi Cenedlaethol ar draws y sector cyfan, i gynorthwyo gyda'r gwaith o gefnogi Partneriaeth Datblygu'r Gweithlu Gofal Cymdeithasol ac yn benodol er mwyn cynnal y gwariant cyfredol ar hyfforddiant cymhwyso ar gyfer gwaith cymdeithasol, trwy secondiadau neu gynlluniau hyfforddeion. Disgwyliwn weld datblygu parhaus yn y meysydd hyn. Cydgyfnerthir y ddarpariaeth ychwanegol a wnaed yn 2004-05 yn rhaglen 2005-06.

Yn amodol ar benderfyniadau'r Cynulliad yn ystod y Cylch Cynllunio Cyllideb nesaf, bydd y ddarpariaeth grant a gynlluniwyd ar gyfer 2006-07 yn £6,250,000.