Mewn man gwan band eang?

Beth yw man gwan band eang?

Mae man gwan band eang yn digwydd fel arfer oherwydd y pellter y mae person yn byw o'r gyfnewidfa ffôn leol - po bellaf, gwannaf yw'r signal.

Mae dod yn ddigidol weithredol yn golygu bod pobl yn byw bywydau llawnach a mwy gweithredol, a gall busnesau ehangu a chystadlu'n fwy effeithiol. Rydym wedi ymrwymo i alluogi cymunedau sydd â'r angen mwyaf.

Sut rydym yn helpu

Rydym yn buddsoddi mewn seilwaith Technoleg Gwybodaeth a Chyfathrebu (TGCh) a band eang i alluogi cymunedau a busnesau ledled Cymru i gael band eang. Rydym yn gwneud hyn drwy:

Adnabod a galluogi mannau gwan band eang

Gyda help BT rydym wedi nodi rhai cymunedau gwan band eang ac mae gennym raglen ar y gweill i uwchraddio'r seilwaith sy'n eu gwasanaethu. Mae miloedd o safleoedd yng Nghymru wedi elwa ar y buddsoddiad ar y cyd hwn sydd wedi rhoi darpariaeth band eang y genhedlaeth gyntaf.

Er mwyn cofrestru'r ardal lle rydych chi'n byw fel man gwan band eang, defnyddiwch eich Ffurflen Gofrestru Man Gwan Band Eang.

Rhoi cymorth ariannol i unigolion a busnesau

Nod y Cynllun Cymorth Band Eang yw darparu cyllid cynorthwyol er mwyn prynu datrysiad band eang i gyflenwi gwasanaeth lleiafswm cyflymder band eang o 512Kbps i unigolion, busnesau, cyrff trydydd sector a chymunedau. Bydd hyd at £1,000 o bunnoedd o gymorth ar gael.

I fod yn gymwys ar gyfer y cynllun hwn rhaid eich bod yn methu derbyn band eang neu fod gennych fand eang sydd â chyflymder lawrlwytho sy'n gyson o dan 512Kbps.