Adroddiadau ar berfformiad Cyd-bwyllgor Addysg Cymru (CBAC)

Mae'r Adran Plant, Addysg, Dysgu Gydol Oes a Sgiliau (APADGOS), sydd wedi cynnwys rheoleiddio cymwysterau o fewn ei swyddogaeth ers Ebrill 2006, wedi ymrwymo i reoleiddio cyrff dyfarnu yn effeithiol er mwyn sicrhau tegwch i ddysgwyr.

Mae hyn yn golygu sicrhau bod cyrff dyfarnu’n darparu gwasanaeth o safon uchel fel y gall dysgwyr fod yn hyderus bod canlyniadau arholiadau yn gywir ac yn ddibynadwy.

Mae’r rheoleiddwyr yng Nghymru, Lloegr a Gogledd Iwerddon wedi sefydlu disgwyliadau perfformio y mae’n rhaid i gyrff dyfarnu eu cyrraedd yn ogystal â chyhoeddi cod ymarfer y mae’n rhaid i gyrff dyfarnu ei ddilyn. Mae’r rhain yn sicrhau bod dysgwyr a chanolfannau’n cael y gwasanaeth gorau i gwsmeriaid a bod safonau arholiadau’n gyson dros gyfnod o amser.

Os nad yw corff dyfarnu’n cyrraedd y gofynion hyn, mae’r rheoleiddwyr yn cymryd camau pendant i wella perfformiad y corff dyfarnu. Mae’r rheoleiddwyr yn adolygu’r disgwyliadau perfformio a’r cod ymarfer yn gyson er mwyn parhau i wella perfformiad y cyrff dyfarnu.