Cynlluniau wrth gefn ar gyfer ffermwyr

Rydym yn annog pob ffermwr i wneud yn siwr fod ganddo gynllun wrth gefn rhag ofn y daw clefyd egsotig a tharo anifeiliaid ei fferm.  Bydd llawer o’r trefniadau ar gyfer delio â chlefydau yn addas hefyd ar gyfer delio ag argyfyngau eraill fel tywydd drwg, llifogydd ac ati.

Bydd ein hymateb ni yn dibynnu ar natur y clefyd, ond fe fydd fel arfer yn cynnwys gosod cyfyngiadau ar symud anifeiliaid, porthiant a cherbydau o fewn ardal benodol.  Er y gwnawn ni bopeth yn ein gallu i gadw effaith unrhyw gyfyngiadau mor fach â phosibl, ein cyfrifoldeb pennaf yw delio â’r clefyd.  Felly, yn yr ardaloedd fydd agosaf iddo, gallai’r cyfyngiadau bara am gryn amser.

Bydd hawl symud da byw mewn rhai amgylchiadau ac o dan amodau trwyddedau penodol  h.y. er mwyn godro’ch gwartheg neu i fynd ag anifail sâl at filfeddyg.  Er hynny, dylai pob ffermwr ystyried effaith y cyfyngiadau ar waith ei fferm.

Os ydych yn cadw da byw, dylech feddwl am y canlynol:

• A oes gennych ddigon o borthiant a dŵr ichi allu cadw’ch anifeiliaid ar y fferm am gyfnod hir?
• A oes digon o borfa ar gael i’ch da byw ei phori?
• Os oes gennych dda byw ar ddaliad arall, a fyddan nhw’n gallu aros ar y daliad hwnnw os bydd angen?
• Ydych chi wedi gwneud popeth posibl i ddiogelu’ch stoc trwy fesurau bioddiogelwch da?
• Ydych chi’n cadw golwg ar eich da byw am arwyddion afiechyd?
• Pa drefniadau eraill y gallwch eu gwneud ar gyfer gwerthu’ch stoc?

Dylai ffermwyr godro ystyried y gallai casglu llaeth fod yn broblem os caiff cyfyngiadau eu gosod oherwydd achos o glefyd.  Er hynny, byddwn yn ystyried rhoi trwydded i symud llaeth cyn gynted ag y medrwn ar ôl asesu’r risg.