Dychwelyd i’r gwaith a bwydo ar y fron - gweithwyr

Gellir gwneud bywyd yn haws os gellir cadw at rhai arferion.

Wedi misoedd o ddatblygu cysylltiad agos, y peth olaf rydych am wneud yw gwneud newidiadau mawr i unrhyw batrwm bwydo.  Os oedd bwydo ar y fron yn rhan o’r patrwm hwnnw, nid oes angen rhoi’r gorau iddi – dim ond addasu.

Mae nifer o famau sy’n bwydo ar y fron yn gallu parhau i wneud hynny ar ôl dychwelyd i’r gwaith.  Mae gan gyflogwyr hefyd ymrwymiadau cyfreithiol i’w weithwyr sy’n bwydo ar y fron.

Y cyfan sydd angen i chi ei wneud yw paratoi, bod  yn drefnus a bod yn benderfynol i wneud yr hyn sydd orau.  Wedi’r cyfan, llaeth y fron sydd orau i’r baban a bwydo ar y fron sydd orau i chi.

Dyma ganllaw ar sut i baratoi a’r ffordd orau i fwydo ar y fron fel rhan o’ch bywyd yn y gwaith:

Dywedwch wrth eich cyflogwr

Mae’n hynod bwysig i ddweud wrth eich cyflogwr y byddwch yn bwydo ar y fron ar ôl dychwelyd i’r gwaith.  Efallai y bydd Llywodraeth Cymru wedi dyfarnu Safon Iechyd Gorfforaethol sy’n ei gwneud yn ofynnol i’ch cyflogwr ddarparu cyfleusterau addas ar gyfer mamau sy’n bwydo ar y fron.  Ar y llaw arall, efallai na fydd eich cyflogwr wedi dod ar draws aelod o staff sy’n bwydo ar y fron o’r blaen, a’u bod heb syniad o gwbl beth i’w ddisgwyl.  Bydd angen ichi felly drafod ac edrych ar yr opsiynau gyda hwy, a chofio rhoi digon o amser i’ch cyflogwr fodloni eich anghenion.

Cyfuno bwydo ar y fron â’r gwaith

Dyma rai opsiynau ymarferol allai eich helpu i barhau i fwydo ar y fron tra’n gweithio.

• Gallwch gael llaeth o’r fron fel bod modd i rywun arall fwydo eich baban pan fyddwch yn y gwaith.  Unwaith y byddwch gartref cewch barhau i fwydo ar y fron fel arfer;
• Gofynnwch i’ch cyflogwr am oriau gweithio hyblyg, i’w hamseru o gwmpas eich anghenion bwydo ar y fron;
• Dewch o hyd i ofal plant ar gyfer eich baban sy’n agos at eich gweithle fel bod modd i chi fwydo yn ystod seibiannau.

Mae rhai opsiynau’n fwy addas i fathau arbennig o ddiwydiannau a chyflogwyr, heb sôn am y trefniadau y gallwch eu gwneud ar gyfer gofal plant.  Fodd bynnag, efallai yr hoffech ystyried cyfuniad o’r opsiynau hyn, gan ddibynnu ar eich cytundeb gwaith, â’ch cyflogwr, a’r hyn sy’n gweithio orau i chi a’ch baban.

Cael llaeth o’r fron

• Mae dwy ffordd o gasglu llaeth – â llaw neu bwmp.  Gall ffrindiau, cefnogwyr bwydo ar y fron a gweithwyr iechyd proffesiynol drafod y gwahanol ddulliau gyda chi a’ch helpu i ddod o hyd i’r un sydd fwyaf addas ar eich cyfer.
• Os nad ydych wedi cael llaeth o’r fron o’r blaen, efallai yr hoffech ymarfer fel bod modd i chi arfer â hyn, a chael syniad o faint o amser y mae’n ei gymryd.
• Cofiwch sicrhau bod yr holl offer yn cael ei sterileiddio.

Storio llaeth o’r fron

• Gallwch storio llaeth o’r fron mewn oergell – gofynnwch i’ch cyflogwr ddarparu un os nad oes un ar gael – ac ewch â’r llaeth adref mewn bag oer.
• Gellir storio llaeth o’r fron mewn oergell am hyd at bum diwrnod ar 4’C neu'n is (mae fel arfer yn oerach yng nghefn yr oergell) a gellir ei rewi am hyd at chwe mis. Unwaith y bydd wedi'i ddadrewi'n drwyadl yn yr oergell, peidiwch â'i ail-rewi.
• Rhowch label a dyddiad ar laeth o’r fron cyn ei storio.

Cyngor defnyddiol i’ch helpu i baratoi

• Casglwch gyflenwad o laeth o’r fron cyn i chi ddychwelyd i’r gwaith.
• Cadwch flows neu grys-t a phadiau bron sbâr yn y gwaith.
• Rhowch gynnig ar eich trefniadau gofal plant cyn dechrau’n ôl yn y gwaith er mwyn rhoi cyfle i chi a’ch baban ddod i arfer â’r drefn.